اخواني بشبكة بني عبس إليكم قصيدة الشاعرناصر الشويلعي وردي عليه، لعل ان تلقى الاستحسان منكم:
الصديق اللي منول تغير يامعيوف=دورة الايام تخلف هقاوي من هقا
ماعلى الدنيا واهلها يابوصالح حسوف=يوم ماتمشي معانا على وضح النقا
والحيل والكذب والحسد من طبع الضعوف=الوجيه اللي عليها غبار ٍ ومحقا
الزمن قدم شداده لراعين الردوف= وانزلوا في منزلة غيرهم هو وش بقا
راحت ايام الشجاعه وتخضيب السيوف= وراعي الاموال هالحين للعليا رقا
لو دخل في مجلس ٍ كلهم قاموا وقوف= ياكثر ناس ٍ تحبه واله ناس صدقا
والشجاع اللي منول يحدنه ظروف= لويبيها صعبت اليوم ياعيون الشقا
وانت شفت بعينك وفيه غيرك من يشوف= مثل ماقال المثل من يدورها لقا
وانت شاعر تفهم العلم ورموز الحروف= بيني وبينك معرفه على وضح النقا
والسلام ختام والثانيه لا ماتطوف= لو مرارتها على مايقولون علقا
الرد على الشاعر ناصر الشويلعي:
الصديق اللي تغير بلا ذنب امعروف=أنت عارفٍ الزمن يتركه دون إرفقا
ماسَلِمْ عودٍ بشجرة من أحداث الصدوف=غير.ماالله من صواديف هالدنيا وقا
رحت اطالع بالأصابع واطالع بالكفوف= واستعيد الذاكره يوم يجْرون اللقا
مالقيت ألا المحازم على أبطون الصفوف= سم الأفاعي لعطشان أعاديهم سقا
والزمن مشروك. في خيط قطن وخيط صوف=والفناء لأبناء بنادم ولله البقا
والموفق من بذل جهد في شيء امخلوف=وأزكى الأشياء كلبوها التزوّد بالتُقى
ياابو خالد ماعليكم ملام ولاش خوف=كل مايحصل مقدّر.ظهر وألا التقا
والمقاصد واسعه. ليش ممنوع الوقوف؟= والمعرفه عز وأجمل رحابه بالنقا
وأنت تذكر يوم ترسل عليه في قطوف= وطلعت بالمختلف صورتي بالملتقى؟
مار ضيفٍ ما استحى شيّمه ضمن الضيوف=واسترْ أحوال العواني ونقص الاصدقا
وسلامة الجميع
معيوف ابن زهيميل