[رشيد]

.
.

والله ما ادري وش يبي يرضي الناس
ذي حاجةٍ دايم تدور بخيالي

لي وقت افكر واضرب اخماس باسداس
واشوف الاقصى قبل اشوف الموالي

وقررت أوضح كلمةٍ ما بها باس
ما تجرح الا مدعين الكمالي

كم واحدٍ لوث ثيابه بالادناس
وقضيته تهتز منها الجبالي

يدري بها اللي بالمواقيف حساس
اللي تعلم من دروس الليالي

شوفه بعيد وعنده ادراك واحساس
ولا رافق الخايب على كل حالي

من رافق الخايب مرده للافلاس
قلته وقالوا محتمين التوالي

الرفقة اللي ما تثبت على ساس
اقرب نتايجها الفنا والزوالي

والصاحب اللي عشرته ترفع الراس
اشري رضى نفسه لو اخسر حلالي

من زود طيبه ما يجي عندي الياس
أفخر واماريبه لاجا له مجالي

وقت اللوازم ما لوقفاته اقياس
تسعدني أفعاله ويرتاح بالي

الطيب للرجال عزٍ ونبراس
ولا احدٍ يحوزه غير قرم الرجالي

والمرجله ما هيب حبر بقرطاس
تحتاج رجل بالمواقف مثالي

حتى ايش لو هي تنسب لبعض الاجناس
لو انهم ناس لهم راس مالي

من لا بذل ماله بطيبٍ ونوماس
ما ينفعه لامات جمع الريالي
.
.
#شعر
أحمد بن سعود الحمد
.
.

الموضوع الأصلي: رجل المواقف | | الكاتب: رشيد | | المصدر: شبكة بني عبس