**معركه شريفه برواية بني رشيد :
غزا العقيد مانع ابن ناكوت من البراك يم ديار عنزه
ولما رجع لديار بني رشيد وهي ممحله وجافه
قال للشيخ قاسم انه جاء من جهة ديار عنزه ببيضاء نثيل
ووصف له العشب والربيع والخضره بديار عنزه
وقرر الشيخ قاسم الرحيل يم ديار عنزه
ورحلو معه جمع من بني رشيد وهم جماعة ابن حمود من القلادان والعجاونه والدواميك والمشاعلة والزبون وافراد من بعض فخوذ بني رشيد الاخرين ، اما ابن شميلان وابن حمد فربعوا يم الجنوب ولم يكونوا مع قاسم بشريفه .
وعندما وصلو لديار عنزه ورعوا حلالهم بشريفه ، وكان بين الرمالات والعمود من شمر وبين بني رشيد عهد وميثاق انهم لايتواخذون لافي مرعى ولا بهامل
(وطبعآ هذا العهد لايدخل في النصره او الفزعه في حال ان بني رشيد دخلت في معركة مع احد القبائل الاخرى والامر ذاته مع الرمالات والعمود من شمر) .
وطلب العواجي من قاسم العاني لكن قاسم رفض وقال نرعى بالسيف نرعى بالهدلا واليد العدلا ، وارسل الشيخ قاسم حسين البراك للعواجي يطلب منه الصلح بدون دفع العاني او الرتاعه لكن العواجي ربط هذا الرسول وركب يم الايداء ينخاه على حرب بني رشيد .
وحج الشيخ الفارس دليم بن قاسم ابن براك ومعه 25 فارس وذهبوا معه الى مكه.
وغزى العقيد عالي ابن حماد من الدواميك وكسبوا ذود ورجعوا لمضارب بني رشيد بالعصر والعقيد عالي يغني ويلعب عليها ويجيبها لعند الامير قاسم ويعرضها وكانت من الابل *الطيبه .
قال الامير قاسم : وش شفت بمغزاك ي عالي ؟
قال عالي :والله ياطويل العمر اما العربان مالقينا الا هالعربان اللي اصبينا عليهم واخذناهم
فلما رأى الامير قاسم الابل اعجبته ناقتين وضح من الذود وطلب من عالي الناقتين .
قال عالي: فدوه ياراعي البويضاء انت عقيدها خذ اللي تبي .
اما العواجي ركب لفرحان الايداء وطلب منه الفزعه ويجونك عنزه ولد سليمان ومعهم الفليحان عيال الغزلان من الشرارت عليهم دم بينهم وبين ربعهم الشرارت *ويأتون ولد علي ومعهم خليط *من اللي يبون الكسب من بلي وجيهنه جموع مالها حد .
وهم يمرحون دون مضارب بني رشيد يبون يصبحونهم ع غفله .
وكان معا جموع العواجي والايداء عدل ابن فنيدل العمودي الشمري ولما امسوا القوم هرب عدل الشمري الى مضارب بني رشيد
واخبر الشيخ قاسم بخبر جموع عنزه ومن خالطهم من القبايل .
ولما اخبر عدل بن فنيدل الشيخ قاسم ,ارسل الشيخ قاسم فرسان من بني رشيد يستطلعون عن اماكن جموع عنزه وفي اثناء استطلاعهم قبضو على خلف ابن كحيل سبر عنزه وجابوه عند الشيخ قاسم ابن براك
قال الشيخ قاسم :وش تقول يا....من اين جاي انت ؟؟؟؟
قال ابن كـحيل :والله انا سبر لعنزه يا راعي البويضاء دونكم وصلوكم هذي هي جتكم عنزه وماخالطها
قال الشيخ قاسم: اقطع واخس والله يا *ان تكلمت لا افرغ هالفرد براسك. ويسكت ابن كـحيل
ويرسل ابن براك للرجال يتجهزون للصباح وجعل النساء والاطفال وبيوتهم وحلتهم والحلال والابل ومنها البويضا اربع رعايا (للشيخ قاسم وابنائه دليم وغلاب وفديغم) ينهزمون امامهم والفرسان والرجال في المؤخرة لخوفهم من هجوم عنزة على العرب وهم مقفين .
ويصبحونهم عنزه والا بني رشيد مستعدين وبمقدمتهم الشيخ قاسم ابن براك .
واول فشقه ثارت الاهي بالشيخ قاسم الخيل الله يرحمه ويطيح من خيله
ويصيح للعبد صنهات وقال للعبد: صنهات ي صنهات رح للدواميك يفكون البويضا
وقال لفرسآن بني رشيد : انا طحت ياعيالي مير الله الله فكوا نفسكم من القوم .
وبعد طيحة الشيخ قاسم هجمو عنزه على بني رشيد .
الايداء ومن معه على يمين بني رشيد ، وولد سليمان من عنزه من الخلف يضربون بني رشيد قفى
وبحد السيف وقوة الرمي ردوهم بني رشيد ويرجعون لبني رشيد بالثانيه ويصدونهم بني رشيد ويردونهم ورجعوا عنزه بالهجوم عليهم بالثالثه وكسروهم بني رشيد وانهزموا عنزه .
وذبح من عنزه في ذلك اليوم 99رجال ويقال ان السبب بذلك محاولتهم تحرير شيخهم فرحان الايداء من الاسر .
وقتل من كبار شيوخ عنزه وفرسانها :
عطاءالله ابن كحيل
وقالط ابن هندي
وعوده بن لذه الايداء
وناصر بن موسى الايداء
وجاعد بن هابس الايداء
وموسى بن جحيش
وغيرهم كثير ووقع شيخ ولد علي من عنزه فرحان الايداء *بالأسر بعد ان كد ع بني رشيد كدتين الاولى على فرسه صبيحا وذبحوها من تحته *والثانيه على حصانه بشير ولما قتل حصانه وقع اسير بيد بني رشيد واللذين قتلوا فرسه وحصانه هم :صادق ابن الموط وعيشان ابن عتيق من البراك وسلبوا بندقيته واخذو الردينه.
وقال حنيشل ابن جاسر : بذبحه بقاسم !!!
رد عليه راشد ابن حسين وقال : هذا مو ند لقاسم .
وهم مايعرفون انه الشيخ فرحان الايداء ولا كان قتلوه .
**ولما اتى ثامر بن سعيده وشافه الشيخ فرحان الايداء ناداه وصاح عليه *ولم يعرفه ابن سعيده
ولما قرب منه قال انا دخيلك ي ثامر وحماه ابن سعيده وعيال عمه حتى وصلوه لقبيلته .
وانهزم الشيخ فرحان الايداء بقبيلته ولد علي وحلف بالله ان معاد يشدها غازي ع بني رشيد وتفرقوا الاخلاط اللي يبون الكسب .
ومابقى بالنفوذ الا بني رشيد وولد سليمان .
ومات من بني رشيد بذلك اليوم سبعه او ثمانيه
منهم الامير قاسم ابن براك
ومنهم واحد من القلادان فارس كان وسط فرسان عنزه يهوش بسيفه بينهم ذبحه الفارس سالم ابن ضعيه عن طريق الخطاء يحسب انه عنزي وقبل مايموت قال :عليه وجهي يالحاضرين تروها وهمه !!! أي بالخطاء .
ومات حميد ابن مشعل وذبحه مهل بن فالح ابن داموك بالخطا .
وثابت ابن معدي ذبحوه عنزه .
وزريبيط البراك ذبحوه عنزه .
واثنين او ثلاثه لم تذكر اساميهم .
ومر اسبوعين وجاء الشيخ دليم ابن براك والفرسان اللي معه من الحج لشريفه
وقالوا له بني رشيد: حنا اكانوا علينا عنزه وذبحوا الامير قاسم وسدك الله فيهم ويعدون فعولهم له بمعركه شريفه .
ولكن هذا الامر لم يثني عزيمته عن الغزو على ولد سليمان
ويقصد شاعر عنزي من ولد سليمان وينخي الرفدي والشملان من عنزه*ويقول:
(كم عجوز جدها سليمان
عرس عليها القايله
تصيح وتنخا فزعه الشملان
وعريسها بالعايله )
وبات ابن براك *ليلته بشريفا ولما اصبح جهز الفرسان والسلاح ولما امسى الليل سرى الشيخ دليم ابن براك بفرسان بني رشيد وامرحوا دون مضارب ولد سليمان *وصبحهم عند نعيمين ويأخذهم ويأخذ ابن سويلم وربعه وينهب بيوتهم وحلالهم عند مكان يقال له ادما او نهيدين .
وردت خيل بني رشيد ع خيل عنزه في ابرق يقال له خديجه ، ويكسرونهم بني رشيد ويكسبون خيل عنزه .
ولما كسرهم الشيخ دليم بن قاسم ابن براك قال لفرسان وشعار بني رشيد قال : اقصدوا عاد ياللي تبون تقصدون ترواها اعرضت وزانت عقب الفعل .
وقال سمير بن راشد ابن الهبدا يوم اخذ من الكسب بنعيمين :
(بديت ذكر الله عزيز الجلال
الواحد الماحود علام بالغيب
بديت ذكر الله عزيز الجلال
فكاك باب مغلقات المناشيب
يامزنه غرا نشت من شمال
تسقي من الحره ليا اقصى صعافيق
اول هللها هلهلت بانهشامي
على شريفه مثل طش اللعابيب
عشبه مواحيل الركاب الغوالي
وزبيدها روس المهار الغواريب
جانا العواجي حاذف تقل جالي
يوم ان ربي دعثره وطاح بالضيق
جانا وجيناه الضحى بالعيالي
صطه مكن ماهي بكل التوافيق
يوم انتحى المظهور واقفى الحلالي
ردوا عليه قروم ربعي هداليق
والشيخ فديناه تسعين غالي
وابن كحيل اللي يذكربه الطيب
واشوف الايداء يدين القوم مالي
من كف كوخان العيون المعاطيب
وابن سويلم شاف ظيم الليالي
بيته غدى بايمان ربعي شواليق
جبنا ذراه ومحجره والدلالي
معا راس محقان ع فكه الريق
وهذا الثرى والا تؤى العمر بالي
العمر مو دايم للمخاليق
والله يامن عقبها مايوالي
مخلاص من قفى ولاله مطاليب
ويقول الفارس عاصي ابن عطران البراك:
يامزنه غرا غشانه كتامه
قامت تعزل نوها تقل ربان
سيله عروم وراح يلقى العدامه
وردوا سنا سيله ذريفين الايمان
الشايب اللي مايفول سلامه
الشايب الحلحيل مياح الاردان
اللي ذبحنا كلهم من جلامه
من قوم مشعان ومن قوم فرحان
وابن كحيل اللي تجينه علامه
اللي على سور المناكيف عزام
كم واحد منهم بترنا حزامه
من طبته وسط المغاتير ماقام
*
وقال الشاعر الفارس عتقى ابن داموك :
بديت في ذكر الولي قبل الابيات
من قدم المولى فهو مايخيبي
جانا معشي الضيف بالجمع زافات
واخوات بقشه منزحن الحريبي
جمع جهينه مع بلي والشرارت
مثل التهامي يوم شمسه تغيبي
تشاوحونا تقل مقهور خلفات
وردو عليهم منغصين الشريبي
بني رشيد من الظفر جوك ردات
الكل يفدع مثل حر قضيبي
مسبلين ارواحهم يوم الادراك
دون المعور وامهات الحليبي
ولاحسايف غير شيخ لنا مات
واثراه عندي مثل جدع الخشيبي
تسع وتسعين من مدال المهمات
اللي وطينا طايحن بالشعيبي
فيهم سباع شريفه اللي هزيلات
مربعات ونايشاتن بطيبي
تاخذ عليهم ضبعة الضلع كيفات
والطير يأكل لين شمسه تغيبي
حتى انت يافرحان عقناك بالذات
عقناك وانت فوق زين الهديبي
مشعان كبك في نهار الملاقات
وهزاع واللي يدركون المصيبي
راحو ع قحص المهار العريبات
خلوك يافرحان عشى كل ذيبي
حريمهم يوم المكاسيب كرهات
الكل تعول مثل خلج العزيبي
دليم غايب والنقا تو مـا جاك
ياعل حذف الشيخ فيكم يصيبي
ابن سعيده عتقك بين لمات
عيى عليك الله ودمك مريبي
في ساعه للموت حلياوشارات
لولاه لو صيحت مالك مجيبي
مايستوي للموت نفوسن كريمات
ياللي بلوذات المساعر تطيبي
*
ويقول المقوعي :
(دليم حبس الخيل ياعض نابه
يمناه باللقوات تحمي طردها
اخوان بقشه شمسهم يوم غابه
نزل لهم بين النفود وجلدها
بايمن شريفه يشبعن الذيابه
اولاد وايل طير شلوى جلدها
تسعين لحيه كلهم من قرابه
غير الرجال اللي تعدد فندها
ابن سويلم والعواجي سطى به
هدم مبانيها وقرشع عمدها )
وقال الشاعر عايض الابيتر :
(قرار حنا بالملاقا شياطين
رصاص كوخان العيون اشتهاكم
نخزكو بالقاع خز القعادين
كم طلقن ايماننا من نساكم
تبغون وطيتنا وحنا معيين
عيب علينا مشينا بيهواكم
وش انت خابر يوم سهله نعيمين
وجفره شريفه يوم سالت دماكم)
دحة الشاعر سليمان ابن عبكي ابن تمام الجعفري العنزي بكون شريفه:
(دليم يوم الفى من حجه-ليا تقل برمح تسجه-يبكي غثيث الشيبان
يابنيه جيناهم صوله-حنا شدينا من خوله-سمعنا الديره منزوله-الديره عقب الجدان
حنا طلعنا مع شفا-ما حنا عليكم خفا-والرمي عليكم ضفا-ايدا واولادسليمان
كدينا عليهم كده-والنذل واقف ماوده –وردونا دون الابل ورده-نعم بالاود الشجعان
الايدا ضربهم عرض-رصاصه يقل الارض –من يمنا خطو الديقان
راعي الذلول المزيونه-شرد وربعه ينخونه-حط النوازي من دونه-يالربع لاتلومونه-والله ياحمسونا حمسه-والاشهب شارقه شمسه-مثل ابا قبيس الدخان
اهبوا هبيتوا خلق الله-تبون اجحد ثناء الله-يا با الزعيم انه قوماني
ثناهم ما اجحد ثناهم-يامشعان اقطع طرياهم-تكره الخيل ملاقهم-شطير عيون ويمان
ماشفتوا يامال النجم-يوم ادرقنا بالرجم-والكبري هاجمنا هجم-حادينا حس النونان
الطيب يامال الجنه-يوم الركايب طشنه-في خشم القاره كبنه-اخو مجلي الثمان
خيلنا للابراق كظت-وخيلهم للتالي جظت-نعم بعيال الشجعان
هم ضرويه حرايب-لاطوا جنين للشايب-خلوه يدوج فروان
شريفه مااحد نزلها-ريحتها ساقت باهلها-من ضرب سلاح النونان))
وهذي قصيده شاعر اخر من عنزه:
ثلاث ردات ع العسر واللين
والرابعه مارد الاول لتالي
وش عاد لو في كل كده ثلاثين
ماصابنا دون البويضاء جفالي
ولو طاح دون الشيخ تسعه وتسعين
وردوا مبيعه العمار الغوالي
المصادر :
(العرب الاواخر : ص 864-865-866-867-868-869-870-871-872)
(اقوال الشيخ فرحان بن شميط الاطروحي من ولد علي وهي بخط ابنه دويلان ، وهي مخطوطه محفوظه لدى الاستاذ الباحث عطالله ضيف الله ابن حنيه الرشيدي)