طاووسيّه
- قصيدة نشرتها مجلة اليمامة يوم الخميس
الموافق 13 أغسطس 2015م.
غريبة أطوار، ونفسيّه
وتبغى أستظرفها وأستلطفها !
تتصنّع عفويّتها الوهميّه
وتحلف لو إنّك ماتحلّفها
غلطانه ميّه بالميّه
وتكابر وتبرّر موقفها !
تكلّمني بإستخفاف وفوقيّه
وتتفلسف فلسفةٍ أستسخفها
تدخلك بموضوع المفهوميّـه
وأصناف التخريف تصفّفها !
عايشةٍ بأحلامٍ ورديّه
وغارقةٍ بأوهامٍ تتخطفها
مسوّيةٍ "مودرن" وشخصيّه
ومغرورة بالدنيا وزخرفها
تستعرض مشيتها الطاووسيّـه
اللّي أنواع التيه تغلّفها
ومدرعمةٍ درعمةٍ عمياويّه
سبحان مدبّرها ومصرّفها
تبغوا تدروا مِنْ هيّه ؟
خبلاً تعرفني، وأعرفها
• شعر : بندر نواف الرشيدي
آخر تعديل بواسطة بندر نواف ، 18-09-2015 الساعة 10:44 PM.
توقيع بندر نواف |
أحدٍ حضوره باقيٍ في غيابه
وأحدٍ حضورة لو حضر كنّه غياب !
بندر الرشيدي
حسابي على تويتر
https://twitter.com/alrashedibandar
|
|