يالله صباح خير انتم وش جاكم يالبرمكي انت وشاعر الشبكه الكبير المعزب
بسم الله ابداء قبل مبداء التعابير= اللي بحكمه صار فرق البناني
فرقبها طفلن وفرقبها كبير=مابه تشابه باي مخلوق كاني
ومن بعد هذا ياهل النهروسدير= وش جابني في ردكم بالاغاني
شايب ومعرض عن جميع المشاوير= عقب الشباب اليوم جسمي شناني
ونتم عليه ترسلون المناظير= ماني بسلام من عتبكم ثواني
البرمكي حرك طويل الاشابير=وجاك المعزب كنه البهلواني
شاعر ويركع له كثير الشواعير= وياليت ربي من اخلاقه عطاني
وقول له وحذره نوع تحذير= على العصور الفايته لايحداني
يوم البدو والروض فيه النواوير= متخالطن نبت النفل بسعداني
ولاذعذع الغربي عقب ماطر عصير= وجاك النسيم بريحة القحوياني
ومد الدبش مابين شعل ومغاتير= وتنكست في روض عشبه لياني
والنار شبت للوجيه المسافير= بيتن يجونه طايلين اليماني
واللبن حمس وقلطن المباهير= وبرد قهوته واخذ الهندواني
تسمع دنينه يوم ناداء المسايير= يقول حي اللي من البعد جاني
وما المحبه عاقبتها زمهرير= نارن وبردن يالله المستعاني
والخاتمه يامن بيدك التدابير= رحمتك واغفر مانطقبه لساني