كفيّ على خديّ وعيني شاطحه كيف أستريح
تحوفني شـرد الظنـــون ولا حسبت أحسابها
أشدّ عظمي وأتعزوى وأحتزم وآآقف واطيح
واردّها فــي ذمتــي .. وأنا لهــا وأولابها
لو كل شاعــر حاكمـن معنـاه والسانه فصيح
ماشفـت كلــن لا طرقهـا هجــرس وغنــّــابها
أمشـي بركـب القافلـــه وامدّ من فيض القريح
وأسوقهـا وأحايـل المرقــاب ليــن ارقا بها
أضحك ليا هل المطر .. واغنــيّ ليا هب ريح
وأرمي على صفق الهبايب خنجري بنصابها
أبحث عن الممنوع فـ الموضوع وأعدّ الصحيح
حسب إجتهادي صبتها واقـول ربيّ صابها
وأتابــع أحــداث الليالــي كلهّا .. حيل ولقيح
وقمــر عربســـات اللــه أنــّه لا يهينه جابها
يلـفّ فــي عرض السما ويدور فـ الجوّ الفسيح
وأليا لقــط لــه سالفــه وأمخالفــه هذرابها
لا واللهّ الاّ جــفّ قــاع البيــر والمايــح يمـيح
دقــّت نواقيس الخطر مير العرب وش صابها
كلــّن يـزوزي غـاربـه .. غربه بعد جاله نضيح
وجمالها راحت تحـــكّ ظهــورها بـ أرقابها
الغرب يرسم خطـّــته ويحــطّ ويشيــــل ويـزيح
والشرق .. لو يزعل بهـا لابـدّ ما يـرضى بها
حطّ العميـل وعاملـه .. واحوالهــم كلـــش منيـح
وشعوب يعرب لاهيه فـ الكلمه وفـ اعرابها ؟
من سايــر الأيــام وردّ أعلومــها ماهـــو صريح
يا اللي تراجع فهـــرس الأحداث فلّ كتابها
وحكـاّمنــا .. آمنــت بالمعبـود نافخهــا المديح
وأكثر ما يشغلها مقاس إبدالها وثيابها !
تصفنـّــا للحــرب .. وحـنــّا نستــعد ونستــريح
وترتاح في ســدّ القصـور المحكمات أبوابها
أهل الظفر وأهل الكرم .. راحت ذليـلٍ مع شحيح
أثر الفضايح كلــّـها .. من سترها وحجابها
تمشي على دين النبي وتلوذ فـ احصون المسيح
والناتـج الحاهــا تــردّ المشكله لـ اشنابها
هـذا حصيل أعلـومـنا .. والمسـجد الأقصى جريح
خمسين عام وعلــّته لاامسى بها يصحى بها