عزي لمنهو ياجماعة تعنا = وامسى ولاحوله من الناس جلاس
ماغير صوته لا تمثل وغنا = كنه ينادي للهواجيس باحساس
ياليل تكفى في رحيلك تونا = ياحافظ الاسرار من دون قرطاس
اخذ المعاني للزعيم المطنا = وقله سلمت وياعسى مابكم باس
بعدك يابوتركي تغير وطنا = والمجلس المعمور خالي من الناس
العام فيه الكيف هيل ٍ وبنا = وفيه العلوم اللي من الراس للراس
واليوم مانلقى مع الناس بنّا = نمسي ونصبح والمباني على ساس