هواجيس شعري كلها في هواه حيام
وياكثر ما اخفيته وياكثر ماقلته
احبه هنا وامشي معه والوعد قدام
لو ان السبيل المعتبر صعب سهلت
زهمني غلاه وجيت كلي وله وهيام
دخلت بعيونه واسود الرمش كحلته
وصحيت حلمي فيه عشق وطرب وانغام
ودخلته بقلبي لحاله وقفلته
كتبته شعر واحساس صادق وصار الهام
نظمته على لحن القصايد ومولته
طرحته سؤال ولغز وحلول واستفهام
وسقت له روحي حب والعمر سبلته
جذبني غلاه ورحت بالشوق له درهام
وسجل بصندوق الضماير وفعلت
سهرته لحالي والمخاليق عنه نيام
غمسني فـ روحه لين ذبت وتخللته
قربني ومد ايديه يمي وفا واكرام
وضميت طيفه في خيالي وقبلته
وصفته وجفت في تواصيفه الاقلام
مشيته طريق بكل وجهه تنقلته
ضويته شموع وعشت في سكرة الاحلام
ظميته غرامٍ بازرق الدمع بللته
احبه ولا اسمع فيه واشي ولا نمام
يعيش بحنايا الروح والقلب منزلته