عسى الله يبيض وجه عبدالله بن عبيد=وعسى الله يكثر في ربوعه من أمثاله
هذا والله اللي يبهر المدح والتمجيد=وهذا والله اللي يطرب الراس بأفعاله
يستاهل رجل علمه وفعله مشهود بالطيب وفعل الخير
تنازل عن المعسر تعالٍ عن التشديد=وعلاٌ تنازل طيب الذات منزاله
كذا يفعلون كرام الأنفس هل التوحيد=عفاف الجناب متربة لحية العاله
الله يجزاه خير
وإذا الدين مهما ثقل يمكن له التسديد=ترا الطيب دينٍ ينكسر ظهر حماله
هنا الإبداع في الوصف والتمثيل
وعبدالله بليا تشرط ولاتقييد=عفا عن خصيمه وأكرمه وأطلق حباله
لعله فداه مجمع الكاش والتقصيد=بخيلٍ عن المحتاج مقصورٍ رياله
بخيلٍ يعيش الهم والذل والتشريد=لو إنه جمع من كل مايطري بباله
هذي حالته يتعب ويشقى على التحصيد=ويجمع وهو نفسه مع الوقت رحالة
ريالٍ يدخٌل خزنته .. يحكمه تابيد=إلى يوم تفرح في خبر موته عياله
ليا انهالت الأتراب في حفرة الرعديد=وفكت خزاين تجرته جتك منهالة
تفلت مثل مايفلت الجافل من القيد=ذبحها البطا ومن البطا الحال يرثاله
هذا ماجنا من فايدة جعل ماله فيد=حصيله لغيره والدعاء ماتهياله
يحسبون جمع الأرصدة للمقام يزيد=ومن ماارتفع بالطيب مايرفعه ماله
وهي لو تطارد من هرفها سراب البيد=من البيد رحالة .. وبالبيد نزالة
عليهم يسوقون الأراذل قصيد وصيد=قصيدٍ تجيك قصاره تباري طواله
نفاق..وخداع..ومسح مشلح..وتقبيل إيد=عسى الله يذل الشاعر اللي هذا حاله
وأنا والله إني ماتعودت للتعبيد=ولا أهفيت شعري مدح في عفن وحثالة
ولكني أمدح كل طيب لو إنه بعيد=من أبسط حقوق الشعر مبناه لرجاله
وعبدالله الله يجعل أيام عمره عيد=ويجعل جزاه الجنة ويقبل أعماله
جذبني بفعله لين جات البيوت الغيد=تقل صف ما اكتب بيت وأدور بداله
وأنا كل فعلٍ طيب يشدني وآشيد=براعيه..لو ماياصله غير برسالة
ليا زان قاف الشعر في دلة التقنيد=أصبه..وأعدي عن هل النقص فنجاله
وأسوقه لمثل معرب الجد بالتحديد=هو اللي عليه ضروب الإبداع ميالة
بيوتٍ نتاج أفكار ماتقبل التقليد=تجي من طغا بدع الأناشيد مختالة
ولاهو غريب الطيب يحضابه الصنديد=لكن الغريب ليا تراخى ولاناله
كريمٍ يناظره البخل نظرة التنديد=يبا يحتويه ولاعرف وين مدخاله
وينظر له الجود من الإعجاب والتاييد=تقول إنه يقول الله يعز مرساله
ليا ضاق صدر الطيب من كثرة التعقيد=وشحت به نفوس البخيلين يلجاله
على سمعته راع الحوايج يجيه مكيد=ويلقا على بابه مناويه وآماله
له من المكارم مايجرد عن التعديد=علومٍ تسجل في رصيده وتبقاله
يجود..ويزود..وينتهز فرصته ويعيد=ولا قيل من للمشتكي قال حنا له
ولاقال قول ودق صدرٍ سواة الحيد=من الحزم بيض أفعاله اترجم أقواله
صدا الطيب يبقى لو نفوس الرجال تبيد=مصير الزمن يحييه لو يفني أجياله
ماماتت فرس حاتم وتصويتة ابن مهيد=لهالحين تصدح في صداها هل الطالة
مواقيفٍ الها بالمجالس من الترديد=مايثلج صدورٍ لابيض النور شياله
ختام الكلام وزينة القول يابن عبيد=لك الشعر يبسط كفه ويرفع عقاله
لم يسعفني التعليق والإطراء في هذه المعلقة الراقية من شاعر تعجز الكلمات عن إعطائه حقه
وشهادتي فيه مجروحه
ابدعة واجزلت حيث اجتمعة في هذه الشامخة الجزالة والمفردة والوصف والحكم
صح لسانك وعلا شانك وبيض الله وجهك ويستاهل عبد الله بن عبيد صاحب الطيب