يا الله عليك ولا على خلقك ولطفك يا لطيف
أرجوك عيبي تستره وأدعوك ذنبي تغفره
جمّلني ولبسني التقوى من الدين الحنيف
وأجعل حياتي من رضاك موفقه وميسره
الحمد لك والشكر لك والفضل لك ثوبي نظيف
ما دنـّسوه اللي تمد كفوفها وتشبّره
قريحتي حيّه وقافي يرسم الحس الرهيف
أفرد جناج الطير وآخذ منه ريش المحبره
وأن عرضوني للشتايم والظلايم يا منيف
الشجره اللي ما لحقها الرمي ماهي مثمره
من جاني ودمّه ثقيل .. اردّه ودمّه خفيف
ومن جاني ودمّه خفيف .. أضحك معه وأطيّره !
ومتوحّش التغريد لا قابلته يعوّد أليف
وأن كان عنده مرجله طلّعتها من منخره
أقدر أردّ المخطيه بالمخطيه ماني ضعيف
لكنّ أطوّفها وأقول العفو عند المقدره
يكرم كفيف العين ولا كرمت يا العقل الكفيف
الآدمي لا صابه جنون البقر صار بقره !!
بعض العيال اللي يكافينا البلا ماله وصيف
محسوب من ضمن الرجال وفيه من طبع المره
يغار واليا غار ثار وجاك بالهرج اللفيف
ما يكشف الثرثار بين الناس غير الثريره
الحرّ من حقّه ليا عــدّا على الضلع المنيف
وإلاّ الغراب غراب لو يرفع ويرخي منقره !!