[ابن الصميدي]

كان ودك بالفراق ابشششر


من بغى الفرقا لقى له عـذر و اسباب و دليل
خــل عنـك العذر و الاسباب دام الحب ضـاع

كان ودك بالفراق.. ابشر عسى عمرك طويل
لا تـردد و انـت لـك كلمة و لـك امـر ٍ مطـاع

لـي عليـك انّـك تبّـت بكلمـة ٍ تشفـي الغليـــل
ولك عليّ انـي لأوّقـف وقفـة الرجل الشجـاع

لاتجاملني مخافة (قال) مدري خوف ( قيل )
عمر ( هرج الناس ) مايسمن ولايغني جياع

كان قصدك ( سر حبك ) اوعدك لأصبح بخيل
واحمل اسرارك معي للمـوت قـدر المستطـاع

بس قلها. قل ما احبك. وابشر بصبر ٍ جميل
لاتحسب أني مثل مـن طبعهـم لوي الذراع !

صاحبك ماهـو كـذا ياصاحـب القـد النحـيـل
صاحبك طبعه غريب وغربته غربـه طبـاع

في الهوى مايقبل الحـل الوسـط ولا القليـل
مثل ماهو لاشرى يشري .. ليامن باع بـاع

ثابت ٍ لو هي تميل الارض حدره .. مايميل
يدري ان الفقر ماهـو عيـب و الدنيا مـتـاع

ماعشـق لـذّة حياتـه كثـر عشـق المستحيل
ولا كـره حتى مماتـه كثـر كـره الأنصيـاع

كم تعلّم مـن شديد البدو وش معنى الرحيل
وكم تعلّم من غروب الشمس وش معنى الوداع

وكم تعلّم من سحاب الصيف وش معنى الحصيل
و كم تعلّم من ليـال البـرد وش معنـى الضيـاع

ايه انا هذا طريقي ( موحش .. وصعب .. وطويل )
و انت لا منـك تعبـت .. العالم فجوجـه و سـاع

اعتبرنـي فـي بدايـة سكّـتـك عـابـر سبـيـل
و رح وانا قلبي معك من ويـن وجّهـت الشـراع

يكفي اني لاانذكرت فـي سالفـة عشّـاق .. قيـل :
عاشر احبابه شجـاع .. وفـارق احبابـه شجـاع





.
.
.



الشاعر فهد المساعد

الموضوع الأصلي: كان ودك بالفراق ابشششر | | الكاتب: ابن الصميدي | | المصدر: شبكة بني عبس