ياجـلّاب النمايم خابرين بضاعتك كوكتيل
على ذوق الرخوم اللّي تعاملك وتعاملها
ماعندك غير ذي قالت وذي قالت وقال وقيل
علومك من يجملّها مدام الله ما جمّلها !
على النكّ النسائي محتزم بالفرد والدربيل
لا شفت الغافله ترفع طرف ثوبك وتختلها
تحاول تبتدع معها الكلام وترسل الإيميل
وإذا قامت تردّك قمت تبلعها وتتفلها
تلبّسها الظلايم والتهايم يا ضعيف الحيل
صحيح اللي ما خاف الله .. ما خاف الناس بأكملها!!
حصينات المذاهب يكرمنّ .. ولاعليهن ميل
لا بان الميل في بعض الرجال وفي مراجلها
لو أنـّك تعتبرهن من خواتك يا رعاع الجيل
عرفت أن الستيره ما تحطّ إلاّ في منزلها
حراير من قبايل لا تسمّيهن بنات الليل
ترى اللي في ضميري كلمة ٍ مانيب قايلها
أعرف إنّك عريب الراس لكنّك طويل الذيل
عسى الله لا يبارك في الذيول ولا يطوّلها !!