/الله واكبر كيف مني تمكنت ! = الين ماصارت حياتي حياتك
حتى خفوقي راح يتبعك من رحت = وللحين مدري وين ضاع بجهاتك !
الاحق طيوف الغلا كل ماشفت = طيفك / يفز اللي يحلف بغلاتك !
تصدق طيوفك وهي طيوف موب انت = قامت تجافيني ، تسوي سواتك
الحين عيني تلتمع كل مادمعت = ولا قبل هي تلتمع من حلاتك
ياهي ذبحتني نظرتك يوم ناظرت = ثم قلت والضحكه تداعب شفاتك
هذا انت من فرقاي عايش ولامت = وتقول بان فرقاي سبب وفاتك
ايه والله اني مت دونك ولاعشت = ومحدن مصبرني سوا ذكرياتك
الموت عندي ماهو اليا تكفنت = الموت بعدك والحياة ف رضاتك
ماغير اردد ليت مايوم صادفت = طيفك ولاربي قسم لي لقاتك
تدري وش اللي يذبح الروح لاكنت = في وسط ربعي ثم طرتلي سواتك
الروح تبكي وغصب عنها تبسمت = مجامله ياروح ، لمي شتاتك !
مجامله راجيك اصمت ولا هنت = ياخافقي تكفى التزم في سكاتك !
وتدري وش اسوي ليا مني اشتقت = وبدت تجيني جروح مايوم جاتك !
رشيت عطرك في عباة امي وصرت = صرت اتخيل هالعبايه عباتك !
واضمها وانام واقول ياانت = ياجعل فرحك منه تبكي عداتك
وكل الذي في غيبتك شفته وذقت = ياجعل دايم يبتعد عن صفاتك !
وتدري وش ادعي لخافقي كل مانمت ! = اقول له ربي يعجل مماتك
قبل انكره هالشي والحين امنت = (اني احبك وانت حبك لذاتك )
يالله عسى مني مثل ماتمكنت = تطلع وتاخذ من حياتي حياتك
