ويلاه من هاالهوى هذا ومن هاالغرام=يلوحني مثل لوح العاصفه للجريد
كبرت كبر الشقا فيني وزاد الهيام=طنشت.قام اشتياقي في خفوقي يزيد
مل الجفا خافقي. حل.الوفا واستقام=نزلت حي الطعون ولاطرالي شديد
جاورت شيخ الشقا وازعلت ريف الوئام=من يوم الاحباب صار قلوبها من حديد
صفعت وجه السهر واطرفت عين المنام=إيقضت غفوه وقام الطرف ينزف صديد
بلشت بلشت هل التلعه وطال الخصام=واستقزم الصلح واستفحل عناد العنيد
لو ماتداركت من سمحه شعفت السنام=اقفا قبل مايقول انت الرديف الجديد
قلت ايه وانت الكرامه في بطون اللئام=وانا احسب انك على صكات بقعا عضيد
قال انت حضك ليا شديت يرخي الحزام=ماكنه الا فشق بندق ورماي صيد
قلت ايه انا عشت ضد وعاش ضدي مرام=يطمع بي الديش ماعمري طمعت الزهيد
اصارع الوقت واغني لسرب الحمام=حزين غربه ودمي جف وسط الوريد
انعى سرور الطفوله قبل عشرين عام=كنت احسب اني شقي واثرني اكبر سعيد
قال ارفع الصوت قلت ابشر بجود الكرام=وغنيت له شوق واسمعت الحضورالقصيد
طوعت له روس عسرات المعاني حشام=وحطيت له روس عسرات المعاني عبيد
الشاعر / عبيد الداموك الرشيدي