وش فيك مثلي تشكي الحزن يا طير
كسرك حدا الجنحان وألا افتقاده .
. تشكي وأنا أشكي واجمعتنا المقادير
والكل منّا غربيته في بلاده .
. يا طير أنا مثلك كثير التفاكير
والحزن وثّق في يميني قياده .
. حتى على البسمه يجي له تعابير
يرسم ملامح صورته واعتماده .
. بس الأكيد اني أصد المعاصير
وأكافح الدنيا بصبر وجلاده .
. اشوف همي لو كبر عندي صغير
وألمح شعاع النور لظلم سواده .
. واللي صبر يا طير يلقى تباشير
لابد يلقى في حياته سعاده .
. دنيا الأمل تعطي للأحلام تبرير
نكبر وتكبر هالأماني زياده .
. يا طير كان الحظ ساق المعاذير
وأبطت مع الأيام كبوة جواده .
. اكفخ بجنحان الأمل للمخاضير
وش لك بقاعٍ ما يفيدك حصاده .
. لك منزلٍ ما جاه قبلك مسايير
ولا قبلك أحدٍ قد تملّك وداده .
. تعال وأسكن في عيوني عن الغير
رمشي غطن لك والجفون الوساده