السلام عليكم ورحمة الله وبركاته
جديدي عسى إن يحوز على رضاكم
حصل شيء لكن ماحصل شيء دون أسباب=ومهما حصل نقول خبرة ورى الخبرة
لكن شتت الأفكار وانهارت الأعصاب=وبيّح ضميرٍ فيه الأسرار منقبره
وأنا ماوقفت بموقف الخايف المرتاب=نحرت الظلام وطال شبري على شبره
لكن الليالي تكسر الخاطر المنصاب=وكسر الخواطر شيء محدٍ لقا جبره
توارد من الضيقة علي الهموم أسراب=مساراتها خمسة وسطواتها جبرة
لوأني قريّب كل وقتي من المحراب =وسكرت باب اضوق عليه من الأبرة
وأخذت التجارب من صفا وقتك اللعاب=وحلمت بمصيري معك من نغمة النبرة
اجاملك لكنك تهالك جزاء وعقاب =على واحدٍ وزّع على شيمته صبره
نهاك وتناها لين صبره وجهده ذاب=وحلّاك لوأنك قبل تعرفه صبرة
لكن الكتاب اللي قريته وراه كتاب=صبر يازماني ماكمل داخله حبره
ابعلّق الموضوع في مغلق الأبواب=وابعطيك بيتٍ تسبر المقبل بسبره
تربعت وسط الجفن واسوارك الأهداب=لكن وش يحفظ السور لاطاحت العبرة