المبتـدا بسـم الله الرحمـن عـلام الغيـوب
المعطي اللي عارفٍ قصدي وعارف ويش ابي
ربٍ يزيد لمن شكر وايضاً غفور لمن يتـوب
استغفره واتوب له من خوف واطلب مطلبـي
جعله يسخر لي ملائكته لـحسْنـات وذنـوب
يدمح من ايسر منكبي ويزيد فايمـن منكبـي
تعبت أحث الرجل فالظلما لعسـرات الـدروب
وياشينها شيناه لامن ضاع جهـدي واتعبـي
أحيان اقول الشعر ذنب وكل مافكـرت اتـوب
أقول انـا بنظـم قصيـدٍ مايخالـف مذهبـي
وتشب نار الشعر في صدري لياهبت هبـوب
الزند من فكري وجـزلات التماثيـل حطبـي
والمرجله ماهي عقال وغتره ومشلح وثـوب
ياللي تليّـم فـي همولـك خلهـا لأم العبـي
المرجله قول وفعل ماهـي سواليـف الكـذوب
اليا ضرب صدره وقال ابشر وفي سد شنبـي
محدٍ على درب الجمايل والمعاريف امغصـوب
وان كان مايركض لها الرجال لايحبـي حبـي
واهل الحلال اليا اهملوه من الشمال ليا الجنوب
اما يجيه الذيب والا راح فـي بطـن الصبـي
والمنتهى دنيا تدور ، وعمر الانسان محسوب
ومليون صلَّ الله وسلم عنـد ذكـرك يالنبـي