لكل من مر هوووونااااااا
قصيدة ارحبي ثم ارحبي
. الجادل اللي شفتها بعد انقطاع ٍ دام عام
جتني .. وكنها من لهيب الشوق تحبي لي حبي
يوم اقبلت قلت اسمحي لي اوقف بكل احترام
ودي أكحّل ناظري واشفي من الشوف تعبي
يالعنبو الاشواق ,, يالبيه ,, ولاّ ياسلام
إلا فديت كفوفك اللي ماسكه في منكبي
وش ذنب عيني في رجى لاماك تسهر ماتنام؟
وش ذنب قلبي يوم قطّعتيه ياشبه الضبي؟
وش فايدة قصر ٍ بنيته داخل ضلوع ٍ حيام؟
وش فايدة عمر ٍ عطيتك.. ماتحقق مطلبي؟
قالت :(عصاني حظي اللي طاح ثم مازاد قام)
والشوق شاهد والظروف ,, وقسوة الايام بي
لا تحسب اني يوم جيتك ناقصه هرج وملام
جيتك ابيك تلمني من هامتي لين كعبي
تكفى !! وانا لى قلت تكفى ,, خابره تاريخ يام
انهم هل الفزعات واني ذاخره منهم صبي
قلت ارحموني من هوسها لا عثى فيه الظلام
إلا على صدري تحدي كل همك والعبي
مادام هذا مطلبك (ياوجد حالي)..(ياحراام)
ولاّ على طاري التوجد (ياسبي حالي سبي)
ماقطّع كبود العطاشا كود مرواح الغمام
والحين يوم الله جابك هاتي اشرب واشربي
كم قد سريت آخايل البراق في ليل العتام
وارجع من الياس مغلوب وشايل ٍ ضيم ركبي
زلي على ماطاك وانسي من تناهيت الغرام
همك جلاااا دامك وزيتي ,, (وارحبي ثم ارحبي)
قالت انا لك , وانت لي ،، والعالم الباقي حطام
هذي انا مابين يديك ,, آمر تدلل ,, وشتبي ؟
قلت اشهد ان الشوق فاضح لا رحم جد الهيام
وانتي على ماقالوا العشاق (طبي وسببي)
ولا وعيت الا على صوت الإقامه والإمام
وآفز كني فاقدٍ لي شي ,, وآمس شنبي
واثر الحكايه كلها اطياف حلم ٍ في منام
واثر العشيقه عند اهلها ,, وانا عند امي وابي‘‘ .