الشعر يعني .. وبعض احيان ما يعني
والجرح ضيفٍ سكن بي والحشا بيتـه
الشعر ارضي .. يوم ان الهم زارعني
الشعر نهرٍ .. شربني يـوم صبّيتـه
سهّرت وجهي وكف الصبح يصفعني
كني بصمتي جرحتـه يـوم ناديتـه
ياما تحلمـت فـي قربـك ولوعنـي
قلـت اتحلـم ببعـدك لـو عانيـتـه
يلعن ابو الحلم بس الحين طاوعنـي؟؟
لو ادري انه بيصدق كـان صحيتـه
ما انته لحالك عشان تقـول بايعنـي
كثير كسـروا ذراعـي يـوم مديتـه
اكذب البعـد .. ليـن الهـم يقنعنـي
كني على كثر ما اذكرنـي تناسيتـه
قبل انتفارق وتنسى جرحي اسمعنـي:
وش فايدة كل جـرحٍ فـيّ خليتـه؟؟
ما قلت لك من (بعد) بعدك يسنّعنـي
هلحين شفنـي عمـا فالليـل سرّيتـه
ضايع من اللّه وطاري البعد ضيعنـي
تبـي تدلـه وطالـع ويـن وديـتـه
ياكبر ظلمـك تسافـر مـا تودعنـي
ماكنـك اللـي ذبحنـي ليـن حبيتـه
كم قلت يا آدمـي بعـدك يروعنـي
وياكـم جـرحٍ يجينـي ماتحريـتـه
اذكرني اليا نثرك الشـوق واجمعنـي
واذكرني اليا حضنك اسمي وضميتـه
واذكرني اليا ذكرت الدمـع قطعنـي
وان مر في خاطرك رقمـي ودقيتـه