[خياااله]

مـوعـد وكـوبـين شاي وبـنـت تـغـلـيـني

زعّـلـتـها الـبـارحـه والـيـوم أصالـحـهـا



جـتـني وداع ولـقـا واحـتـارت يـديـني

ما ادري ألـوّح لـهـا والا اصافـحـهـا ؟!



قـلـت اسـتريـحي هـنـا يـرتـاح تـخـمـيـني

والـشوق يـفـضـح نوايـاهـا ويـفـضـحـهـا



في وجـهـهـا كل طـهر الـغـيـم يـسـقـيـني

تـشرب من الشاي واشرب من ملامـحـها !



قـلـت ابـتـديـها قـصايـد مـني وفـيـني

كـتـبـتـها والـغـموض الـعـذب يـشرحـهـا



رمـشك جـهـاتي ونـظراتك عـنـاويـني

وعـيـونك أرضٍ تـمـسّـيـني وأصـبـحـهـا



وأنـفاسك اللي تـهادى بـيـنـك وبـيـني

أوراق تـنـثـر دفـاهـا وآتـصـفـحـهـا



لـمـلـمت شعرك سـتـايـر لـيـل خـلـيـني

أذوب في كل خـصـلـة قـبـل اسرحـهـا



أيـه أضـحـكي لـيـن تـتـفـتـح شرايـيـني

روحـي حـمـامه وضـحـكاتـك تـجـنّـحـهـا



طـفـلـة عـلى طـيـشـهـا أنـسى ثـلاثـيـني

واتـخـيـل الريـح مرجـيـحـه وامرجـحـهـا



إن كـان زعـلـتـهـا يـالله تـهـديـني

وإن كان تـعـبـتـهـا يـاحـب ريـّحـهـا



وان زعـلـتـني عـساهـا ما تـراضـيـني

ويـالله عـسى كـل ما فـيـني يـسامـحـهـا