[خياااله]

ضيقت ّ صدري ياصحيبي على مااااش
ليت الكـــلام اللــي تقولــه حقيقي !!


سمعت فيني قـول كاذب وغشاش .!
ما همــه الا يبعدك عـن طـــريقـــي !


كــم قلت لا تستمع قــول الاوباش !!
(والظاهــر انك في عنادك غــريقي).!


ماهوب حـق تقــول قــولك وتنحاش !
"احرص ترا بعض الحكـــي ما يليقي"


اترك بـلاش الهرج واقـرب واخذ كاش
الصدق اعــزه مــــن معــزة شقيقي


مــا همنــي مــا ينقله يمــك اللاش
مـــدام نجمـي قــــام يبرق بريقــي


ما عاش من يكــذب عليـه ولا عاش
من يبتغــي بالهــرج تنشيف ريقــي


لو كــان قلبك ابيــض ٍ كــنه الشاش
ما بعتني مــن غــير علــم ٍ وثيقـي


لكـــن قلبك مـيت ٍ يـطلـــب نعاش
والظاهر انه جــرح قلبـك عميقـــي


مــن باعــنا ببـلاش بعــناه ببــلاش
بعــض الخــواطر تركــها مـا يعيقـي


راس الضبــي ياصاحبي مابه عراش
وهـزل الحكـي كل ما توسع يضيقي


اللي زعل من ماش يرضى على ماش
واللـــي سرقــــه النــوم لازم يفيقــي..

الموضوع الأصلي: الي زعل من مااش يرضى على مااااااش.. | | الكاتب: خياااله | | المصدر: شبكة بني عبس