خلاص مات الحب فيني والالهام=هان الغلا وعشرتك هانت عليَه
لا ترتجي من عاشقك شوق وهيام=طلعت من صبري وشرهة يديَه
على مدى فرقاك سجيت الاقدام=اعتقتها والنفس منَك بريَه
أكبر من الكلمة على نزف الاقلام=واكرم من كفوف السخا للعطيّه
واصدق من الدمعة على خد الايتام=واوفا من اخلاص الخوي أل خويَه
هذاك حبي ياسبب موت الاحلام=يوم الوصايا تحتضنها وصيّه
ولا انت لاهي في جروحي من العام=تجرح وتلحقني خطاها خطيَه
تذكرني في ضيقك وتنساني ايام=وتحط كل ماضقت حرَتك فيَه
يوم المشاعر جت على جالك حيام=وردتها لعدود حوض المنيَه
خليتني بين الحقيقة والاوهام=وانا على النيَه ونيتك نيَه
لعبت دورك صح..في زيف الافلام=مثلت لي قصَة هوى العامريَه
عزفت لك من صادق احساسي انغام=وغنيت لك اخاف اصير الضحيَه
وصرت وشفني منقسم سبعة اقسام=مثل الشضايا لا قفتها شضيَه
لكن على كل حال..قدام..قدام=مصير حي الوقت يصدف بـ حيَه
صحيح ما جابتك لي بيض الاحلام=لكن تجيبك سود الايام ليَه
الشاعر المبدع/ خالد الهطلاني