لا لا تقولونـهـا... لا لا تقولونـهـا
انا بصراحة عجزت افهـم مضامينهـا
ما ودي افهم. ولا ابغى الناس يطرونها
الشمس غابت بفجر الاحد ؟ يا شينها
كلمة : من الليل الأسود ماخـذة لونهـا
و أدمى بكبـد الجزيـرة حـد سكينهـا
ما هو بتكذيب , لكن مدري اشلونهـا ؟
احـس كـن السمـا تمطـر براكينهـا
الكون شاحب وحزن النـاس بعيونهـا
والارض شفت الألم والحزن كاسينهـا
مصيبةٍ هـزت الدنيـا وفضـا كونهـا
عليك يـا ذا الجـلال اليـوم تهوينهـا
يا رب لطفك مقاييس الصبـر دونهـا
يارب رحمتك تلطـف فـي مصابينهـا
أواه يا نفـس بـاح اليـوم مكنونهـا
الله ياهي مصيبـة !كيـف تقوونهـا؟
ياالله تصبر نفـوس الشعـب وتعينهـا
من يمسح دموعها اللي تغرق عيونهـا
رملا لقت في ظلالـك كـل مغلينهـا ؟
وثكلى تشوفه عوضها بموت مضنونها
والا عجـوزٍ تحسـب تالـي سنينهـا
الله يجبـر عزاهـا ويشفـي طعونهـا
ايتامها , اضعوفها , اسراها , مساكينها
بقعـا تكشـر وكفـه تكسـر سنونهـا
وشلفاه مغروسـة بمقـرن حجاجينهـا
وياالله دعوة مـن عبـادك ويدعونهـ
عفوك ولطفك ورحمة منـك راجينهـا
ومن فوق قبر أمواتنا ترعف مزونه
سحايب الخيـر مـا تاقـف ودادينهـا
وداعهم الله , ونفسـهم ربـك يصونهـ
وداع , للجنـة الخضـرا ورياحينهـا