[ذيبان الرشيدي]

.
.

يامغاتير النوايا ..درهمـي يم الجنـوب =وأدبكي .. جرد الفيافي واذهنيلي واسبقي
جنبيني .. وابعدينـي عـن مغاليـق الـدروب =وادهلي .. دربـٍ بغيتـه وافهقيلـي والبقـي
وان بدالك .. ليلن أسود غَشمتْ فيه الذنـوب =كوكبي .. لا يرهبك مربـاع مفـرود ولقـي
ماعليك .. امن الذيابه لاقفت صلف الهبوب= ولاعليك .. امن الليالي لاخذت عمر الشقي
غطرفي بين النثايل.. دكي البيد الرحوب = مابقالك كود خطوه .. وش بقالك وش بقي
مالهبكي .. حر ريحن هبهبـت قبل الغـروب =والغروب .. اليـا تدبـا مارضخلـه مشرقي
والخيانه ماغشتني .. واظهرت كل العيوب= والجزيله ..لا تثنـت طوحتها بندقـي
أن غفت .. عين الحقيقه واسهجت عين الكذوب =جيت أبين .. في متاريـس القصايـد ملبقـي
اطرح المخطي .. وارضه واثلبه حتـى يتـوب =ثم أشعثر .. هجسـن بقلبـه تهـود وتلتقـي
ماحقر شعري .. خسيسٍ بايع الذمـه هيـوب =ارتكى .. فوق الجذيبه ثم نبـحّ نَبـح سلقـي
أغرف .. البحر المسمى وأنحت الصخره وأجوب =وأفتل .. أبياتٍ علـى كـل القصايـد ترتقـي
ويازمانن .. يخلف الهقوات ووصوفـه لعـوب =جيتلك .. من ضيقتي عندي سؤالـن منطقي
يازمانٍ .. ماعرفله كود علام الغيوب =وين الأقي .. يا زمانـي صاحـبٍ قلبـه تقـي
صاحبٍ .. ماباقني وأن لزتـه سـود القلـوب =وافياً .. ماخان صاحه صافيـن فكـره نقـي

.
.

لعل .. لـ الإستعجال منها نصيب ..!

الموضوع الأصلي: يازمانٍ ماعرفله كود علام الغيوب ... وين الأقي يازماني صاحبٍ قلبه نقي ..! | | الكاتب: ذيبان الرشيدي | | المصدر: شبكة بني عبس