[سيوف بني عبس]

لاضاق صدري قلت يا قاسمت خير .... سج القدم يمشي على غير داعـي
عديت للعالـي بعالـي النواضيـر .... وادله ليا شفته على الحزم اشاعي
واسهروساهرت النجومر الزواهير ..... لاما يجي للفجـر نـور وشعاعـي
قالو لي ابله قلت ياهـل التفاكيـر ...... هاذي علوم اهل العلوم الضياعـي
وانا مغير مولع القلـب يـا بديـر ....... اشري وابيـع مشترايـه وباعـي
والله مغير اصخر القاف تصخيـر ........ تصخير مادوب العصا لين اطاعـي
ومن دق به مثلي هجوس وحواشير ...... يضيق به لـو الطريـق اتساعـي
امقابلن خضر الودايـا المهاجيـر ....... على حفافن بيـن حـره وقاعـي
والله لو ان الغرس والقصر والبير ...... تمشي على مافي هوايـه وناعـي
عن ديرتن فيهـا تـدب الجعاريـر ....... وفيها الدجاج وماشبه لـه يعاعـي
لشد وانزل فـي مـرب الخـواوير ....... امشي مع الحزم السماح الوساعي
ليااختلط نبـت الزهـر والنواويـر ...... غزيت في العبله عمود الشراعـي
غربن من النفره جنوب المخاضير ...... شرقن من الفيضه شمال الكراعـي
ياوي مرباعـن بهـاك النهابيـر ...... وياوي سلفانن بها القلـب ياعـي
تلقا بها سمـر البيـوت الدواويـر ....... سمر البيوت مثولثـات الرباعـي
بأطرافهـا كنـه قصابـة جزازيـر ........ يفرح بها الطرقي ليا أضرم وجاعي
وهي بيوتن لمتيهييـن المعاشيـر ........ ألاد روق أهل الطعـون الوساعـي
اللي ابهم شقـح البكـار المغاتيـر ........ ترعا بهم فالخوف من غيرراعـي
تلقابهـا شقـر البنـي الغنـاديـر ........... زرع القلوب لكـل قلبـن ولاعـي
اللي لهـن بمولـع القلـب تاثيـر ........ قسمٍ مـن البنـك الكبيرالزراعـي
واللي لهن من طب الامراض تقرير ...... تقريـر طـبٍ للقلـوب الوجاعـي
اخذتلي معهـم مطيـر ومشاويـر ....... ركضة جهل يوم الهلـع والدلاعـي
واليوم عنه اقفيت لوهـن مناحيـر ....... حسم لحـل المشكلـه والنزاعـي
واقفيت عنه اقفاي ركب المعاييـر ........ واخذت من تالي المحبـه وداعـي
الا بحب اللـي بنـاري مصاييـر .......... سمرن على جال المنـاره مقاعـي
يازيـن شبـت نارهـا للمساييـر ......... لجالهم عنـدي عليهـا اجتماعـي
اخـذ بهـم زال الحيـاة التعابيـر ........ والا انها ماغيـر عبـر ومتاعـي
واسند عليهم في ليـال المعاسيـر ......... ويروح شبري في محطة ذراعـي
والاهي الدنيـا بربـح ومخاسيـر ........ يومٍ حدور ويـومٍ الهـا ارتفاعـي
ولا كل طيرن ينتقلـد علـى طيـر ....... ولا كل من هام الشجاعه شجاعـي
ماينتقلـد بالـحـرار العصافـيـر ......... ولاينتقلـد بالـقـروم الافـاعـي
لو قلدو الشيٍ علـى شـي تغييـر ....... مايتقلـد بالطبيـعـي صنـاعـي

للشاعر : عبدالمعين بن عقل الثعلي العضياني .... رحمه الله

الموضوع الأصلي: لاضاق صدري قلت يا قاسمت خير ..~~ق؟!؟!ش | | الكاتب: سيوف بني عبس | | المصدر: شبكة بني عبس