[لسعهـ شقآوة]

لحظه !! ترى ماجيت اقدم لك اعذار
لحظه !! وبعده سوي اللي تسوين

لحظه !! بصحِّح بيننا بعض الافكار
وباقول لك حاجه قبل ماتقولين

لا تحسبيني بانثر الدمع وانهار
والا اترجى واطلبك ما تروحين

روحي عسى دربك بساتين وازهار
روحي وغيري بالمخاليق تلقين

صحيح لك بالقلب حشمه ومقدار
لكن شسوي لك اذا ما تحسين

لي قلب لامنه عشق حيل مدرار
ومن الغلا عندي يكفي ملايين

بس إن لقى صد وجفى صار جبَّار
وأقدر افارق واهجرك لاتخافين

يابنت انا لي عزتي وباخذ الثار
وابغى انصحك لارحت اصحي تنادين

ماني براجع لاتقولين وش صار؟
لاتسأليني ليه ؟ انتي تعرفين

غيرك تمنوني وبالعب وباختار
واعشق بدالك الف وحده بيومين

وانتي رصيدك بالغلا عندي اصفار
ماهو بذنبي ماعرفتي تحبين

وكل الذي لجلك كتبته من اشعار
والله خساره فيك ماتستحقين

حتى صورك اللي من العام تذكار
بادوسها وانتي قبالي تشوفين

ياما عطيتك الف إنذار..وانذار
أقدر افارق..قلت لك : لاتحدين

واليوم انا ليه اتعب النفس واحتار
دامك جرحتيني وكنتي تسلين

إن كنت حي ومن طويلين الاعمار
لجرح بدال الجرح تسعه وتسعين

والحين يالله خلي دموعك امطار
وباحاول اضحك طول ما انتي تصيحين


ل الشاعر المبدع ....

حامد زيد

الموضوع الأصلي: لحظه !! ترى ماجيت اقدم لك اعذار >>ق\ش | | الكاتب: لسعهـ شقآوة | | المصدر: شبكة بني عبس