يالهنوف اللى محلك في حشاشة جوفـي
من كثر موتى عليك ..اموت فالشرقيـه
يابعد من صان قـدر ولاجحـد معروفـي
ارتعي بيـن الحنايـا راضيـه مرضيـه
بس تدرين السبب ..في هاجسي والخوفي
انى ازعل خاطرك ..بالقسـوه العفويـه
وقسوتى يانور عينى من قساة ظروفـي
والا انا قلبـي حنـون وممتلـي حنيـه
كان حزن الكون كله من اعـز ضيوفـي
وماتت الضحكه.. بموت احلامى الورديه
العنا والضيق ..عندى..طعمهن مألوفـي
الصباح ضيوف هاذي .. والمسا هاذيـه
نادراً في هالزمان وفالبشر مـن يوفـي
الوفي ..دقه قديمه... والوفا ....رجعيـه
كم وكم كف ٍ .قطعتلهـا العهـد بكفوفـي
أنقضت عهدى ووعدى .. ماقلبت النيـه
مير واللى عز راسي .. وارتكى لكتوفي
انك اول واخر اللى ..بأعشقـه موليـه
عمرى اللى فات قبلك ماعليـه حسوفـي
من بعد شفتك نسيت سنينـه الهجريـه
هاك قلبي والمشاعر والغـلا وحروفـي
كلهـا تشـري غـلاك ونزفهـا جاهيـه
صار صبري فالحيـاه بجيتـك مخلوفـي
حيًك الله من حبيب.. وحيها مـن جيـه
كل حسن في محيـا هيبتـك موصوفـي
مابعد حسنك جمـال .. ولابعـدك بنيـه
لك عيون رمشهـن لاسلهمـن سيوفـي
جعلنى فدوة دمـوع ..النعّـس الخدريـه
لو بناظر يم غيـرك جعلنـى ماشوفـي
كيف لا؟ياا جمل بنات الكـوره الارضيـه
لو يجن وحده ووحده .. او يجن ألوفـى
دام انا معى الثريا . ويش ابـي بثريـه