وطيري اللي في ليـالي هـداده
تقطـعت من راس كفي سبوقـه
بانت مواري مقبـلاته وعـاده
لا طال عمره بان خافي عموقـه
زرعٍ نفد قـدام ياتي حصـاده
مات النبات ويابـساتٍ عروقـه
ليلي من الظلما تزايد سـواده
على ثـمـر قلبي وطبه وعـوقـه
عينه وكفه وان تحدث زيـاده
شفت السعاده في مبادي طـروقـه
قم يا خيالي تالي الـليل نـاده
قـله لذاذه نـومنـا ما نذوقـه
وقله ترى سعد تقطع فـواده
مثل الجريح الـلي وساعٍ فتوقـه
وقله ترى أبوك تغير رقـاده
يطلب رقاده والسـواري تبوقـه
يحط راسه فوق جال الوساده
ويشوف زولك بين جفنه وموقـه
ويون وناتٍ عليها شـهـاده
دمعه وشمعات الفـؤاد محروقـه
وقله عسى جنات ربي مهـاده
زرعِِِ زرعنا ماقطفنا عـذوقـه
وقله جرى لي في ضروف ابتعاده
جرحٍ بجوفي ماتبرد حروقـه
حزني بنصف الليل يبدا عناده
واهم يومي من بدايه شـروقـه
لولا رجا اللي يرتجونه عباده
لا شق جيب الثوب وفري شقوقه
ولولا رجا اللي كلنا في مراده
لا زور قـبره واتمنى لـحـوقـه