سر ياقلـم بامـر الثـلاث المناديـب=الفكـر بادلّـه ابيـوت(ن) جــدادي
مثايل(ن) تشمل هل العـرف والطيـب=مني لربعـي مـن صميـم الفـوادي
اولاد عبـس اللـي تضـد الاجانيـب=لاقامـت الهيجـاء ونـادى المنـادي
بني رشيد اهـل الوفـاء والمواجيـب=اللي ثنـوا مـن دون قطـم التـوادي
وعدوهـم يطمـع ولا راح مايجيـب=يدخل بياض الراس عقـب السـوادي
يشيـب لاونـس حاميـات اللواهيـب=بسيوف حـدب(ن) يذبحـن المعـادي
في كف شغموم (ن) يعرف المقاضيب=ويفـرح بحـزات اللقـاء والطـرادي
ورجالهم يارد على المـوت مايهيـب=قـوي عـزم وفـي حياتـه يفـادي
ودخيلهم من يطلبـه يرجـع مخيـب=فـي ظلهـم يدخـل بفـي وبـرادي
يشهد لهم رب(ن) على العرش مايغيب=ويشهد لهم حتـى الخصيـم المعـادي
شي(ن) صحيح ولاعن الصح تجنيـب=اقولهـا واثبـت كـلامـي وكــادي
ولاني وانا فوزان مـن يقبـل العيـب=العيـب طبـع لقاصريـن الايــادي
انا مـن اللـي للهدف دائـم يصيـب=مايحدنـي دون الضريبـه حــوادي
جدي وابـوي يحققـون المضاريـب=بالسيف الارقب فوق صهو الجـوادي
وكل الحمد مثل السيـوف المحاديـب=واللي مكذب ينشـد ان كـان غـادي
ينشد ويلقـى الهـرج كلـه بترتيـب=مالـي ومـال مكثـريـن الــدوادي
ابن حمـد حمـاي حـرش العراقيـب=خصمـه عيونـه يكرهـن الرقـادي
وقفاتهم مثـل المهلهـل مـع كليـب=اللي علـى جسـاس حـب الطـرادي
غزواتهم يشبع بهـا الحـوم والذيـب=يـوم اللقـاء بمصقـلات الهـنـادي
وابن حمود اللـي يجيـب المكاسيـب=اللـي جمـع بالطيـب كـل المبـادي
والسـر يبقـى بمحكمـات الولاليـب=محفوظ ليـن تصيـر بالهـرج بـادي
وخصيت شيخ(ن) يحتمي شمخ النيـب=عقيل غـازي واخـر الاسـم هـادي
من راس شيخ(ن) يدبس القوم مايهيب=لجت جمـوع القـوم مثـل الجـرادي
غازي حمل حمل(ن) عن الكون مايغيب=حمـل(ن) ثقيـل وحاملـه بنفـرادي
وقف بثار(ن) من شمال(ن) وتغريـب=بيـدي شيـوخ وحاكميـن الـبـلادي
ورجع ومعه الامر في داخـل الجيـب=تطبيـق شــرع الله رب العـبـادي
يقـول هـذا الحـق ماعنـه تجنيـب=والا علـى البيـداء مايبقـى قـلادي
والضيـف يبدالـه بكثـر التراحيـب=والجـار ياقـف لـه بكـل اجتهـادي
جعله بجـاه اللـي يحـق المطاليـب=سـلام بالجنـه وريــح الـبـرادي
شيخ(ن) وعقب له صقورن محاطيـب=افعالهم تكثـر علـى اهـل العـدادي
والكـل منهـم يحتمـون المواجيـب=بالطيب والحكمـه وراي(ن) سـدادي
وكبيرهم شيخ(ن) يصـف المشاريـب=مثـل القمـر لاشـع بالنـور بـادي
شيخ(ن) ولد شيخ(ن) لاشك(ن)ولاريب=عقيـل واخوانـه بجنبـه سـنـادي
مطلوبهـم يصيـر لـو انـه صعيـب=وقفـات واحدهـم عليهـا اعتمـادي
متوارثيـن الطيـب ماهـو بتجريـب=صحيـح ماقلتـه بـدون اعتـقـادي
من زارهم يطلـب مطاليـب مايخيـب=بالخيـر والا الشـر كيـد المـعـادي
والمدح باهل الطيـب مابـه عذاريـب=لاصـار مدحـك لامدحتـه وكــادي
والعذر مني ياصـل الشـاب والشيـب=لشيوخ ربعـي دون خـص وعـدادي
وكل القبايل لهـا تاريـخ(ن) مهيـب=كل(ن) علـى حـده يشـب الزنـادي
وختامـه منـي تحـيـه وترحـيب=ترحيب وافـي مـن لسـان الجـلادي
للشاعر فوزان بن عوض بن مربح الرشيدي