انت الخوي في وقت ما للخوي دور
ياصاحب ٍ ماملني وين امله
يشرق على ظلماي بوجودك النور
لوهو بصيص إلا العمى قد فطن له
في ساحة التجار لو عشت مدثور
شمع الشعر ماهو بحاجة أدله
يمكن جمال الورد مايعجب الثور
وان كان ما يفقه معانيك خله
ماعانق النعمان احساسيسه البور
ولا ميزه وش ياسمينه وفله
ولا أنا وياك نسناسنا شعور
نهب من أقصى الشمال ونشله
لوحة أدب يشدي بها كل عصفور
اللي تمايز غصننا واستظله
لوهو يروح أحيان وايام وشهور
يعود لعذوق ٍ ثمرها يدله
ماعابني ياصاح لاصرت مغمور
بعض الظلام ابلغ من النور كله