يَ بنت دام الدم بعروقنا سال
كلٍ على عقله من الفكر شايل
لكن لو قلت لي المهر بريال
والله فلا أعنز عليك السلايل
وأنام في بيت ومكيف جنرال
وأسوق سياره وعندي موبايل
ترا البداوه فعل ماهي بالاشكال
والسلم ما نَرضى عليه البدايل
إنسان متعلم ومن ناس عقال
و فتحتْ عن نهج الحضارات فايل
أنا حضري ماني بنازل ورحال
لو أن ربعي بين ضلعان حايل
ماهو بذنبي ما عرفتيلكْ رجال
ذنب الزمن خلا النشاما قلايل
و لاني بلا رجعي و لا جيت خيال
ولا شايلٍٍ سيفي وصايل و جايلْ
قالت قسم بالله ما شفتْ رجال
مثلك بغى حجر السنين الاوايل
قلت الصحيح يصح لو مرت أجيال
ركب الكدايش غير ركب الاصايل
انا ليا مني خطبت أبغي عيال
أبي العيال اللي تشيل الثقايل
وليا خطبت أختار لعيالي الخال
والدين عندي هو سيد الفضايل
يَ بنتْ لو قلتي لي المهر بريال
والله فلا اعنز عليك السلايل
والله لا اخطبْ اللي على راسها جلال
لو كان مطلبها ثمانين حايل
أنا بقول الحق والحق ينقال
اللي تستر هي بنت الحمايل
ماهو في كشخه وخاتم وسلسال
الستر لعيال الحمايل دلايل