لاتقارب غيض روحي يا جديـد الخوه
حافظ ٍسدي ولي قلـبٍ عليـه يلاوي
لو بدى لك ضوح علمي لا تقارب نوه
في زهازيم السراب وتحسب انك راوي
حبل ظنك عن خفايا قلب مثلـي طوه
ماعرف قبلك نديمي وين قلبـي نـاوي
لا شكيت ولا بكيت وما بدى لك سوه
من جرحه الوقت يلقى بالزمان مـداوي
فقد غالي وانت وظروف الزمان وسوّه
اجتمع هذا وجمره والبصيـر الكاوي
حطها حدر الخفـوق وحرِّقـت بعلـوّه
كيـة المبغـظ ولا والله طلبتـه يـاوي
من كثر ما شفت ضعفي حطه الله قـوه
وعقب لوعات الزمان إلحفظ سدي قاوي
واه من همن على قلبـي جديـد ٍ توه
كل ما يضوي علي الليل جاني ضـاوي
استحل الجاش واوقد وسط صدري ضوه
كنهـا وقـدة دلال دغيّـم الظلـمـاوي