وأنت الوعد وانت السعـد والكآبـه
وأنت الشروق الصبح وأنت الغروبي
وأنت السؤال الصعب وأنت الإجابه
وأنت الصدوق أحيان وأنت الكذوبي
وأنت الوجع بالراس وأنت العصابه
وأنت اللحن وانت الغنـا واللعوبـي
وأنت الشعر والفن وأنـت الكتابـه
وأنت الخلاص الحالتـي والنشوبـي
وانا الجريح اللي عطيبٍ صوابـه
كني على أمري منك صرت أمغلوبي
فعلاً صحيح أهـل المحبـه غلابـه
ولا الوم أنا من فيك شـق الجيوبـي
لو كـل يـوم فيـك شقـق إثيابـه
مالي غناتٍ عنـك مالـي هروبـي
قـوسٍ بفقدانـك ابلـيـا ربـابـه
ولاني على هذ الغـرام امغصوبـي
لكن نهبـت القلـب منـي انهابـه
وأنت السموم اللي تجيـب الهبوبـي
وأنت النسيم اللي تجيـب السحابـه
وشمالي انت ومشرقي انت وجنوبي
وغربي ودربي وانت ليـلٍ سرابـه
وعلي بسبابـك تضييـق الدروبـي
مااسلـك طريـق الا وينسـد بـابـه
اهواك واصلح من خلالـك عيوبـي
وأستلهم اشياءاً منـك فيهـا غرابـه
وتستاهل العنوه و تسـوى الذنوبـي
ولك العمـر ينبـاع بيعـة خرابـه
ماشفت مثلك مع جميـع الشعوبـي
ذوق وجمال وفيك سحـر ومهابـه
منّك خطيـر القلـب إنـه يذوبـي
إن كان طّول مـن غرامـك عذابـه
أركض على ساقتك وسيـر دوبـي
و أزرع عسى ماني بزرّاع طابـه
إن زانت الايـام فأنـت امحبوبـي
وان عضربت يازين ماهي اطلابـه
عساي منك اسلـم بجلـدي وثوبـي
او يقبـل الله دعــوةٍ مستجـابـه
والله مـدري وش تجيـب الغيوبـي
لكـن بعـدك كـل شـي تشـابـه
وقلبي على فرقاك شغوف رغوبـي
واعوي على لاماك عـوي الذيابـه
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــــــــــــــــــــــــــ
صح لسان الشاعر العظيم عبدالله باتل الرشيدي ولاهنت أخي أحمد على النقل وأسمح لي بتصحيح بعض مانقل خطأ سهواً بغير قصد.
ــــــــــــــــــــــــــــــــــــــــــــــــــ ـــــــــــــــــــــــــــــــــــــــــــ
إهداء خاص مني.