[سعد بن عادي]

يالله يـاربٍ بمـا .. فالـكـون عــلاّم وخبـيـر
ياسامعٍ حتى دبيـب .. النمـل فـي جـوف الدجـى
أنـت الغنـيّ .. وكـل مخلـوقٍ لمرضاتـك فقيـر
وأنت الملاذ لمـن لجـا .. بحمـاك وأنـت الملتجـا
أطلبك واسع رحمتـك .. وأطمـع بعفـوك يابصيـر
وأخشى عذابك .. والعبـاده كلهـا .. خـوف ورجـا
وأسالـك التثبيـت لا .. قابلـت منكـر مـع نكيـر
في ساعةٍ فيها الفصيـح .. يلخبـط حـروف الهجـا
والفـوز بالجنـه تـراه .. الفـوز الأول والأخـيـر
والنار شرٍ مستطيـر .. ومـن نجـا منهـا .. نجـا
وأنا ذنوبـي ماتعـدّد .. مـن صغيـر ومـن كبيـر
أشيل في وضح النهـار .. ولا ضـوا الليـل وسجـا
يارب كنْ لْي لا بغيـت .. أنهـض وأفكّـر فالمسيـر
المتن الأيمن شايلٍ .. سلمى .. والأيسر شـال أجـا
يـارب ماغيـرك علـى .. تنزيلهـا عنـي قـديـر
جيت الْك لاجي وأنت ما .. خيّبـت مـن يمـك لجـا
جيت الْك خايف .. منصدم .. مذهول .. وجناحي كسير
عفـت الحيـاه ولـذة .. الدنيـا وحــبٍّ يرتـجـا
ماعاد أفكّر فالهنـوف .. أم الذهـب .. وأم الحريـر
لو قرنها يشرب به .. الظميان مـن قاعـة سجـا !
انصب تفكيري على .. يـوم القيامـه وش يصيـر؟
يـوم إن لا ظـلٍ سـوى ظلّـك يظـل .. ولا حَجَـا
والناس قسمٍ فالنعيم .. وقسم فـي جـوف السعيـر
بين الفريقيـن القضـاء .. عـادل ولا فيـه احججـا
يالله عسانـي مـع فريـقٍ مايـطـب الزمهـريـر
هـذا رجـاي .. وفيـك يارحمـن ماخـاب الرجـا
وتمّـت بيـوتٍ قلتهـا .. والسبّـه الـرد المثـيـر
قصيـدةٍ لاهيـب مـدح .. ولا غـرام .. ولا هجـا