[سحايب]

ياحاجب ٍ عينك عن الزين بلحاف

................ كابوس حلمك والعواقب مريره

لذّة دقايق خلّتك تنظم القاف

................ أنا اشهد إن نظرة عيونك قصيره

حكمت في لحظه بلا عدل وإنصاف

................ مسطول.. فاقد.. تارس الكاس بيره

باكر تعرف إن الحلا كان زيّاف

................ وبكره تعرف إن الكره مستديره

هجوم لعبك بس تنقصك الأهداف

................ ومن لا يسجّل للهزيمه مصيره

الزين ماهو بس بكتوف وأرداف

................ الزين زين أهل النفوس السفيره

مسكين مثلك جاهل ٍ ما بعد شاف

................ مثقال ذرّه من بنات الجزيره

يحفظهن الله كان ما فيهن خلاف

................ كمالهن بالزّين والطّبع سيره

كان الحلا والزّين له سلم وأعراف

................ في دربهن تزحف جموع ٍ غفيره

وإلا انت لو ترقى على راس مشراف

................ إيدك قصيره والنواظر بصيره

إنت إنعدم ذوقك وتاليك ينعاف

................ كاس وحشيش وبوسة ٍ من سميره

رحلة سياحه أسرفت فيك إسراف

................ ولا جنيت إلا ذنوب ٍ كبيره

عاصي عسى تلحق على قسم الإسعاف

................ وتلحق على اللي راح منّه كثيره

زادت ذنوبك وأثقلت حمل الأكتاف

................ ماقد دريت إن النهايه خطيره ..؟