أخذت من الأيام لي درس وعبر
فرقت بين المخطيـه والصايبـه
منها علمت العزيمـة والصبـر
تهزم جيوش الياس لو هي شايبه
العظم لو يكسر يداويـه الجبـر
لا شك لو يبتر فلاهـي طايبـه
ما لد عيني في رفيقٍ مـا شبـر
فعله ولا وقـف نهـار النايبـه
أخاوي السرحان فالليـل الغبـر
لو كان بعض الناس منه هايبـه
وأرقى على رأس الطويلة لا ثبر
غيري وأعاف الناقصه والعايبـه
أمدربٍ في بيت شيخٍ مـا خبـر
قلبي عن أهل الطيب نفسه غايبه
خذيت منه العلم فالصغـر وكبـر
معاي لين الشيب جـت كتايبـه
شبحي بعيد وناظري لد وسبـر
والنفس عن زلات وقتي تايبـه
أمنت فاللي باعثٍ مـن فالقبـر
ناسٍ تفوز وناس ترجع خايبـه
في ساعةٍ ما عاد ينفعنـا كِبـر
الملـك زايـل والنوايـا سايبـه
وأخر كلام العاقـل اللـي يعتبـر
من دورة الايـام كبـده ذايبـه
أقدر أهل الطيب واكـب الغبـر
وأدوس رأس إبليس ولا نايبـه