ياعـل دار تربـه شمـخ النيبـي =تاخذ ثمان اجبة والسحـب تدبهـا
من طلعة النـور لحـل المغايبـي=سحب تعاقب مـع نكبـا تلاعبهـا
من مزنة كن باطرافـه لواعيبـي= كن النمش ينفضونه في جوانبهـا
يسيلنا مدهل العرب(1) الحنازيبـي = ليـن المـلازم تملالـه مواهبهـا
من زور لوذان لضلـع المراقيبـي=في كل جـوٍ امشارعـة ذواهبهـا
لما تشيل الشحم بيضـا محاقيبـي=ويصير مثل الوقايا فـوق غاربهـا
يبني عليها الشحم مثل المهاظيبـي =احجوز خلف السنام وقدام حاجبهـا
كوده يدير الفلك للفطـر الشيبـي =ارفع لها الشـان يادايـر هبايبهـا
اطرح لها الغيث من سود المهاديبي = لين الزماليق تنبث فـي خبايبهـا
غبوقت الضيف في حل المواجيبي= سند الغـوارب جليـلاتٍ محالبهـا
يازين بشعوفها شـوف الدباديبـي= ويازين بظهورها شوفت جنايبهـا
ويازين لروحت من خايع الطيبـي=سحج العشاير تراطمبه ضرايبهـا
لوحت هديرالجمل كنهـا معاطيبـي =كن الخيل مع مجل الورك ضاربهـا
وان عاج عمره لها تطنب تطانيبي=مزين تكيفخ على الحاجب سبايبها
واللي ترزم تصوته تلحق الصيبـي=مزين زغيمه على الساقه يجاذبهـا
وان وردوا فوق عدٍ لـه تناديبـي= والكل منهم بصوتـه قـام يندبهـا
بقران حادي(2) وفي حر اللواهيبي = ريح العبس فايحٍ والقيـظ حاظبهـا
واليانهمها غـدا عنـده تحاطيبـي=أطرافهـا ترتكيلـه فـي مناكبهـا
وان شافت الدلو من بين الجواذيبي= مزين تليطم على الطاره شواربهـا
كم واحدٍ عندها حلى عشا الذيبـي=ولانبياء عندها طـارت عصايبهـا
تكفون ياللي تعرفـون المواجيبـي= اغلوبها واحربوا من كان حاربهـا
تكفون لا ترخصونـه يالمعاطيبـي= يوم اهزلت حالها والوقت خانبهـا
يابد مـن خايـعٍ نبتـه تعاجيبـي = وان رودمت قصبها توفي مطالبهـا
يازين لا روحت وانحت جناديبـي=من عقب شده وضو البيت تجذبها
يازين خلفـه تعيـوال الملاهيبـي = خلفٍ مصاغير حيرانهـا تعاقبهـا
وان وقف اللقح من بني الاطانيبي= حيرانها والشـذا مزيـن تليعبهـا
تمت بذكر الله اللي يعلـم الغيبـي =عدة نجومٍ تناحـت فـي مغايبهـا