ياغايبه كن الشقي محتريني=يومك رحلتي والفرح ودع وراح
رجيت وصلك هاقي انك تجيني=طول انتظاري زادني هم واجراح
صار اللقى معدوم بينك وبيني=ماكنه الا بارق (ن) بالوهم لاح
اخر رجا دمعات حارت بعيني=طاحت ومعها الحيل في غيبتك طاح
طال الغياب وسامحي واعذريني=تعبت من كثر الشقى ودي ارتاح
والصبر شوفي كم سرق من سنيني=ياغايبه والصبر لاطال ذباح
معذور مثلي لو شكى صدقيني=ظامي حنان وفاقد( ن ) شوف الافراح
ان كان لي ذرة غلا ساعديني=زيلي غيابك خلي الهم ينزاح
خليني انسى كل ماصار فيني=يمكني ارجع مثل ما كنت مرتاح