[غربة الروح !!]

اخاف اسولف عن أغانيـك لـ الليل
تجرح عيونك دمعتـك ياعيونـي .. !

اليوم شفتك للدفا تبتسم حيل
الذكريات بطيف روحك خذوني

عذب السوالف .. السهر .. نجمة سهيل
طيشك .. غلاك اللي شهد له جنونـي

الشارع الخلفي وصوت المواويـل
مريتها الشرفه وشفتك بـدونـي !

جالس تسولف بين شمعه وقنديـل
خايف مكانك ينطفي في عيونــي !

حسّيت نظراتك حزن ليل في ليل
وأنفاس ليلك بالجفا كحّـلوني

تشكي حزين من التعب والغرابيـل
مدري عيونك ليه ماطمنونـي ؟!

لا تجرح احساس الدفا بهـّر الليل
الشاي _ هيلك _ زعفرانك يبونـي !

افرح وجيب البـُن يا ريحة الهيـل
الحين باشرب قهوتك : ( من عيوني )



سولف وسمّعنـي حديث القناديل
ولـّع شموعك كثر ما ولعونـي !

ماعاد به وقت لـ زعل يتعب الحيـل
لا لا تكدر خاطرك في ظنونــي !

جيتك بـسولف عن أغانيك لـ الليل
غابت عيونك قلت يمكن نسوني !

رحت وتركتــك بين دمعه ومنديل
حتى الأماني هْـنـاك ماودعوني ..!