[سعد بن عادي]

حدَتني ذكرياتك ياقـدم رجلـي علـى المشـراف=على بحر القصيـد ودرّةٍ تبـدا بخمـس حـروف
بدا في عيني المرسى بعيد وفي يـدي المجـداف=واقيس الموج واقرا الريح وادرى الخاطر الملهوف
ذكرت ايـام مرّتنـا سريعـه والقلـوب انظـاف=قبل ما يزرع ابليس الصدور ويجنـي المقطـوف
أكل سبع السمان الاوّله فالوقـت سبـع عجـاف=ويبست في مزارعنا السنابـل والطيـور تحـوف
ولا ياالسيف وش باقي لنا فـي ذمّـة السيّـاف!=ومن يدفع ثمن دم الضحايـا والعـذر مخطـوف!
ياليت الخوف بـرّى ذمّتـي مـن ذمّـة العـرّاف=ولو انّ السالفه فيها شجاعـه مالحقنـي خـوف
وانا قلبي شجاع ولايهـاب .. وخاطـري خـوّاف=ولساني عاقل .. وراسي عنيد .. وهاجسي ملقوف
أسافر واطلق عنـان القصيـد ولاعلـي خـلاف=ثقه ماهي غرور ومن عرفني ما انكـر المعـروف
لو انّ الظـن لاحقنـي ظليمـه فاكثـر الأطـراف=لكنّ الله يجازي مـن ظلمنـي والعبـاد تشـوف
احبّ الصدق واعـزّ الخـوي واقـدّر الانصـاف=ولا اكره غير من دسّ الحقيقه في كفنه الصـوف
وعيوبي ذنب وذنوبي عيوب ، وكامل الاوصـاف=بعد ما جابته بطن الحياه ولا اصبـح الموصـوف
حقيقـة مجتمعنـا العنكبوتـي شـي ماينشـاف=لو انّ اللعب صاير فيه من فتره على المكشـوف
لكنّه مجتمـع مايعكـس الواقـع وفيـه اجحـاف=مجـرّد ساحـه تلـمّ البشـر وتحـرّر المكتـوف