[سعد بن عادي]

يا رب أنا مذنـب و تايـب و ندمـان=و من خشيتك دمعي علـى و جنتينـي
ذنوبي أكبـر مـن أبانـات و ذقـان=لو كـان مـا هـي للخلايـق تبينـي
قفلـت مـن دون المخاليـق بيـبـان=و لا انقفل بـابٍ مـا بينـك وبينـي
سنين و أنا اتبع هـوى كـل شيطـان=سنيـن غافـل و اتـبـع الغافليـنـي
يا رب لـو ذنوبنـا ريـح و ألـوان=ما كـان حالـي يعجـب الناظرينـي
و ان ما حصل لي منك عفوٍ و غفران=هِلِكـت يـا ربـي و تبـت يديـنـي
لولا الرجا في رحمتك و أنت رحمـن=اليـأس يمكـن للقـنـوط يحديـنـي
لكن أنا مؤمن رغـم كـل مـا كـان=بإنـك يـا ربـي تقـبـل التايبيـنـي
رحمتك ما ضاقت على الإنس و الجان=و يامـا غفـرت ذنـوب للمذنبيـنـي
سترتني مـا يـدري بعيبـي إنسـان=و أخفيـت زلاتـي عـن الشامتينـي
و قابلت عصياني بعطـفٍ و إحسـان=و أمهلتني رغـم المعاصـي سنينـي
و يالله يا معبـود يـا عالـي الشـان=يـا محصـي التاليـن و الاوليـنـي
تغفر ذنـوبٍ حاصرتنـي بالأحـزان=و يـارب تقبـل توبتـي و تهديـنـي
دعوت ذليلٍ ساكـبٍ دمـع الأعيـان=و لا له رجا الا رحمتك يـا معينـي
و صلاة ربـي عـد مـا هـل ودان=علـى محمـد خـاتـم المرسليـنـي