[سعد بن عادي]

سيد الأخلاق كنز الصدور اللي وسـاع
كن وسيع الصدر واطلب من الله يشرحه
لاتضيق وتنفعل من خطا بعض الرعاع
ويش لو يخطي عليك الضعيف وتسمحه
الشجاعه لا تواجه بها غيـر الشجـاع
فارسٍ يستاهـل إنـك تقـوم وتنطحـه
فارسٍ ماتنقـده فـي لسـان ولاذراع
لوتشب الحرب بينـك وبينـه تمدحـه
الحريب القرم مثل الشجيع من السبـاع
ذيب تعجبني وصوفه وانا اريـد اذبحـه
واستحي من ذكر عثرات شيال المتـاع
لو رمح مانيب مثله على شان ارمحـه
الشقي دايم حياتـه نـزاعٍ فـي نـزاع
ضيقته في الصلح وإلا المشاكل تفرحـه
مايجنب عن طريقـه قناعـه وإندفـاع
ويتعدوالك لـو إنـك تحـاول تنصحـه
مثل هذا لوتشوفه علـى درب الضيـاع
ليت مايسمعـك لاقلـت يالله تصلحـه
إبتعد عن ضيقة الصدر قدر المستطـاع
وإحفظ شعورك من اللي يحاول يجرحه
وإن عطيت السر ناسٍ تثق فيهـم وذاع
لاتلـوم اللـي لياجـاه سـرك بيّحـه
لوم نفسك يوم فرطت في سرك وضاع
تفضحه وتضيق لاشفت غيرك يفضحـه
وإعرف إن أيام عمرك نزولاً وإرتفـاع
يوم يرقى فيه حظـك ويـومٍ يطرحـه
يوم يرقى الحظ تلقى جماعه وإجتمـاع
كـل رجـالٍ بكفـه تلـوح المسبحـه
ويوم ينزل كلهـم يرحلـون بـلا وداع
لاإنتهى دورك ولاعاد عنـدك مصلحـه
أكثر العالم يعيشـون تمثيـل وخـداع
مشهدٍ يعرض ودنياك هـذي مسرحـه
شوفنا عقب التجارب وصلنـا لإقتنـاع
ليت بعض اللي كتبناه نقـدر نمسحـه