مدري بصراحه وش اللي فيك يجذبني
صمتك .. هدوءك .. شموخك أو معاناتك
في كل صفحة غلا ألقاك تكتبني
واصير انا لغز حاير بين ابياتك
ان قلت اببعد سحر عينك يقرّبني
عمري ابتدا بين نبضاتك ونظراتك
تدري شعورك فرح أو حزن يعجبني
بعثرتني بين بسماتك ودمعاتك
فرقاك فيها دموع العين تغلبني
ياليتني غيمةٍ واعشق مسافاتك
وامطر على درب قلبك يامذوّبني
واصير غصنٍ حياته دون لمساتك
أهجر .. تغلّى .. بكيفك .. صد شيّبني
أصلا شبابي عرفته بعد لحظاتك
وتصدق اني لمحتك يوم تسلبني
لكن تركتك .. عجبني نوع سرقاتك
ناي الهوى صار وسط الروح يطربني
صوّرت ذاتي سفينه .. في بحر ذاتك
لك في ضلوعي يدين الشوق تحطبني
يروق جو المسا مع طيب نسماتك