يابرق ياللي رفيفـك بـوح وهـروج=باطراف غيمن سرى به طـول ليلـه
نوضك يشق الظلام ويطوي فجـوج=ويبـل كبـد السنيـن اللـي محيلـه
عالي ولك في سماك احلام وبـروج=غالي ولـك فالعيـون اكبـر قبيلـه
ساري وكنك مـن الايـام مزعـوج=يشكيلـك الليـل هــم وتشتكيـلـه
بوحك احسه بقلبن من ورى العـوج=ومدلـه كـل شوفـي يـوم اخيلـه
لقيت ضحكي ودمعي فيـك ممـزوج=وخايلت فيـك الـدروب المستحيلـه
البارحه معـك قلبـي كنـه المـوج=يصفق حنايا الضلـوع اللـي تشيلـه
نقضت جرح الزمان وحب عمهـوج=وبيحـت سدي وانـا راعـي طويلـه
مالي على اللي مضى غايات وسروج=انكفت يوم انكف اللي غـاب خيلـه
من لاشلع ضرسه اللي صار ملجوج=مارتاح لو شـد طـول العمرحيلـه
يابرق لون الشفق بين كمـا الـروج=بشفـاة بنتـن مواريـهـا جميـلـه
لوطول البوح ذوب بالحشـى ثلـوج=وحرك نسيم الهوى غصـن الخميلـه
تصبح على خير واللي ضاق مفروج==خلـك مـع الغيـم سبـار ودليـلـه
زعل الرشيدي