شالح بن علوش
يا سلامي عليكم وسمعوا ويش اقول=كل لحيه نقدره بمقدارها
الله الي بعث عبده اللامه رسول=ارشد القوم حتى غير افكارها
عبدالباري
مرحبا ياهلا والصدق نور العقول=يوم عين الشقاوي دايم ألجارها
عارفين البغال وعارفين الخيول=وعارفين النصارى لعنبو دارها
ابن علوش
الحموله ثقيله وانت شلت الحمول=وفارس القوم ماهو مثل سبارها
عارفين الجمال وعارفين الذلول=وكل دوله نميزها من شعارها
عبدالباري
الجنايز ثقيله لو نعشها محمول=وفرّس القوم تطلع بدري اخبارها
من يحب الطلوع يخاف درب النزول=وأكثر الناس مايعرف وش ادوارها
ابن علوش
لو توقعت ما ضاعت عليك الحلول=والعرب ربنا اللي فرق انظارها
يجهل اهل الاصول الي جهل بالاصول=كل يمنى مقدتن على يسارها
عبدالباري
مااتحسّف على عود الغناء والطبول=مـانـبـي لاحسانـيـهـا ولاأوزارهــــا
الخيـال السديـد تعـد مـنـه السـيـول=كان بعض الطيور تحوم في غارهـا
ابن علوش
والله ان مع اثنتين مالنا ميول=ونت ياصحبي لاتصير سمسارها
والمسافه طويله وسوالف تطول=احسب حساب رحلتنا ومشوارها
عبدالباري
الله إني مااشوف بسوق الأزيا محصول=مار هذي بضاعه وين تجارها
المسافه طويله والمسافر عجول=بعض الأصحاب ماالله بارك اعمارها
ابن علوش
فيه هرج مقول وهرج مهو معقول=والعرده محد يحصد من اثمارها
كان وجهك من احداث الزمان امغسول=لاتصافح رجال طالت اشبارها
عبدالباري
قاطع الخط عرض بعينه العرض طول=تبـرك الناقـه الجـربـاء عـلـى زارهــا
ماعلى الرأس من طق العصى والنعول=مــدةٍ لـيـت راعيـهـا عـطــى غـارهــا
ابن علوش
امتلا رمش ليلا من اجداد الكحول=ونت بندقك عيا يركد عيارها
ابشروا بلمخايل وبشروا بسيول=وكل سلعه ثمينه عند تجارها
عبدالباري
شفت ليلا تجول وقيس معها يصول=مـار قامـت تــرد الـقـوم بخمـارهـا
الـشـلاوى قبيـلـة مالـهـم بالسـهـول=تشعل الحرب مار اتطيح في نارها