يوم أنا غنيت غنيت من مابي
ونتن بأقصى المعاليق محجوبه
ما كشف مستورها اللاش والهابي
والكذوب اللي كلى الناس بسلوبه
تستلمني لا أظلم الليل وإنسابي
وأستلمها لين تنساق مسكوبه
غن يا جرحي على راس مرقابي
أصدح الونه على كل مشذوبه
من صداقة هالزمن خاطري طابي
والله إن بعض العلاقات مضروبه
لا حدن يشره إليا صرت متغابي
الغباوه بعض الأحيان مطلوبه
المواقف عرفتني على أصاحبي
قبلها تايه وكني بغيبوبه
كل يوم يطيح واحد من حسابي
وطيحته لا طاح ما هي بمحسوبه
دام ما له وقفتن ضلعها نابي
ما تشرف به ولا أفخر بمندوبه
أقرب التشبيه فالظن لا خابي
ظن أخوه هدلا بجيشه ومنصوبه
فالرخا جيشه عن العرض ما غابي
ولا نطق له كلمة ترزف شعوبه
يوم جات الصادقه راحوا أحزابي
ما صمد غير الرمادي وبعقوبه
يا أولي الألباب لا قلت الألبابي
أنصتوا للي لكم فر دالوبه
سجلوا شكري مع وافر إعجابي
لزمان اللي صلانا بلاهوبه
الزمان الشين لو كشر النابي
الركايب يمة العز مشعوبه
مالنا عن قمة المجد مجنابي
لو نموت نموت ووجيهنا صوبه
وإن نصانا اللي شكى ثقل الأتعابي
نرتكي له لين ينزاح مكروبه
وقفتن يفرح بها كل منصابي
مثل وقفة جيش سلطان فالخوبه