ياشين طبع فيك يازين الاطباع | لولا الرجا ماكان خليته يفوت
سنع يشوه لا تذكرته اسناع
مثل الحصاه اللي بوسط عقد ياقوت
تخفي هيامك وانت ميت وملتاع | ماتدري انه في ملامحك منحوت
ويآ بخل لسانك وانت للسمع طماع
والبخل في سلم المحبين ممقوت
الحكي قوت السمع واسماعي جياع | ومسامعي ماتت من الجوع للقوت
حكي الغزل في صدرك اشكال وانواع
لكن صمتك حول الصدر تابوت
الى طلبت وصل صعبت الاوضاع | مدري من اللي درسك جعله يموت
وتصد ماكنك من الصد مرتاع
وان قلت يا القاطع تلفت مبهوت
اقطع بدرب مواصلك فالشهر باع | والا انت تقطع للوصل فالسنه فُوت
طٍعني وطاوع واحد فيك ماطاع
ناس ضعاف عقول واشوار وبخوت
والطف بحال اللي نحل حاله وراع | قلب جروحه تنزف افكار وبيوت
قلبي اليآ منه شرى قلب ماباع
وانت هالله هالله فيه والعمر موقوت
واسمع شعاري فالهوى وارخي الاسماع | ياللي غلاك بتربه القلب مكتوت
لا للفراق ولا لتجديد الاوجاع
ونعم .. نعم .. للوصل و لو كان بالصوت