[فضي البراك]

صوت وصدى

من الأرشيف بين خالد الهطلاني وثامر شبيب

ياثامر العشق بيّح خافي أسراري=من عرض بعض السوالف جاب طاريها

وش جابني لك وش اللي جاب هـ الطاري=عامين بقصى حنايا الجوف مخفيها

حاولت اخفّي وعاند ميلة أصراري=لقيت ياخوك نفسي رايحٍ فيها

جيتك ووجهي من اسباب الوله عاري=يكفيك عن مايكنّه صدر مغليها

تدري بحالي وانا عن حالتك داري=مايونس الجرح قلبٍ ما شقا فيها

المهره اللي تحب الصعب وتماري=عند اللزز تستجن لاهاج راعيها

اقفت تشيل الزعل من خيبة اعذاري=راحت ولا عاد يمديني اراضيها

تحطب ضلوعي جفا واشعم لها ناري=ومن لاهب الشوق ساق الرجل اعنيها

ماقل مقدارها ولاقل مقداري=من حب ما يجهل العشره وماضيها

لو واجه العاشق الذكرى بالانكاري=لابد مع جاير الايام يحييها

كانت قصيدة تلحن ضجّة اوتاري=كنت الشعر كانت عيوني وامانيها

اغفي على صوتها وامرّها ساري=وان مرني طيفها وقّفت احييها

لاطاح هتانها تزهربي ادياري=وان سولفت راح كل الليل يحكيها

حدث ياثامر شبيه الما عن اخباري=وعن بعض زلاتها يوم اني اغضيها

وعن وقفتي في لهيب الشمس وغباري=وعن قلبي اللي فقدته في محانيها

من يوم غابت وانا ارجي رحمة الباري=يحميني من صدمة الفرقا وطاريها

الشاعر خالد الهطلاني

وهذا الرد

يامرحبا فيك غصب وطيب واجباري=ترحيب من صاحبٍ خوتك يشريها

اقلط تقهوه دلال البن وابهاري=الرجل وان جاته اضيوفه يقهويها

ارسلت لي والرسايل تتعب القاري=لكن عشانك سهر بالليل قاريها

الليلة اللي تشرع باب مشواري=من قبل تسري علي اروح واسريها

ياخالد ان جيت ناسٍ كارها كاري=ودك تسمي الاسامي في اساميها

وان كان تشكي من الفرقا ومحتاري=مدام خلتك غصب انك تخليها

اليا متى وانت تشكي البعد منهاري=مفروض من يوم راحت وانت ناسيها

القلب لا صار ماهو للجفا ضاري=كل ماتعافت جروحه صاح يبكيها

يشتاق للجرح وراع الجرح ما يداري=يطعن ويترك طعونه ما يداريها

ماانكر الحب يومه شتت افكاري=بديني اسنين واجروحي اداويها

تذكارها ((الشمس)) شف وش كان تذكاري=لاغابت ((الشمس)) موعد مع طواريها

اموت منها ولااطلب منّها ثاري=عايش وميت تخيل من اياديها

تحضن يميني بديها وتطعن ايساري=لو تفتح القلب تلقابه خطاويها

تعبت ليما عرفته درب معباري=وارتحت من حب كان النفس مشقيها

بنصحك من قلب طيبه داخله جاري=زلات ربعه اذا مرت يعديها

لاتدخل السوق لا بايع ولا شاري=ولا تكحل العين كان الكحل يعميها

ثامر شبيب