تلاقيني بدل رمش العيـون السـود أسلهـم للسعَـد واغريـه باتيانـك
أدوّر راحتك لـو بالتعـب موعـود وَلاركـد ليـن اسمّرهـا بجدرانـك
أقبّل جبهـة الوسـم ويديـن النـود عسى تذبـل بعَـد ملفاهـم احزانـك
أذكّر فيك دايـم قولـة ارق سنـود وابنجـر معصـم العثـرة بنسيانـك
أشلّ مْن الثقـال اللـي تفـجّ زنـود وَلافكّـرت اخلّـي شـيّ لامتـانـك
أشوف مْن النوايب غبْن لا محـدود وَلاطلب فزعتك لـو كـان بامكانـك
أحوّل بابي لمفتـوح مـن مسـدود لاصار الدايـن اللـي جـاي ديّانـك
أقوم مْن الزعل لاطاح بارضك عـود وَلااقعد لين ياقـف عـود ريحانـك
أعلّمْه ان سألْك الجوّ بضـع صعـود بأنّ الـذوق ينـزل هـو لجنحانـك
أضيع ان جيتني صدفة.. بدون وعود وادوّر فيك عنّـي وَانشـد اجفانـك
أشوف الغير ضميـان وْلاراه عـدود واشوفك راويٍ واااصيـر ضميانـك
أجيك ونبضـي المعـدود لا معـدود واعـوّد ناسـيٍ جلّـه بشريـانـك
أغير عْلى الشتا لا قرّب لْـك حـدود واغار مْن الدفا الموجود باحضانـك
أموت وكنّـي اللـي تـوّه المولـود بك اااموت وولـدت بيـوم عرفانـك
أحبك حب مـا يملـح معـاه الجـود وَلا ياصل مـداه اطـراء ضيفانـك
علـيّ الله يشهـد والعبـاد شهـود بـأنّـي مانْـوزنـت الا بقيفـانـك