[سحايب]

حزنك شتا والا بقايا من الصيف ............ياوجهي الغايم خذلني صباحك
الدار دارك ما أنت طرقي ولا ضيف..........هذي نفود أرضك وهذا ديارك

وهذي معاميل الغلا وأشقر الكيف........فنجال فنجالين تشفي جراحك
امجار ياوجهي من الذل والحيف....كيف اقنعك هاالدمع ؟كيف استباحك؟

خابرك في وجه الزمن صلب ومنيف......خابرك تبني من سقوطك نجاحك
آياتك الأولى نقوش على السيف...........حاول تهجاها ليا أخطت رماحك

لك من قديم الوقت سهل ومشاريف..........مازلت رغم الحزن يبرق جناحك
ليتك تبدلها ضحوك وسواليف.......... .......هذا الزمن ما يقهره غير ضاحك

الناس من حولك دفوف وغطاريف......ماأحدن درى عن ضيقتك وانشراحك
والليل مثل الناس مشغول بالزيف......يسري ولع ماهو عشان ارتياحك؟!

سولف معه بالكذب سولف تخاريف.......يمكن يجي حلمك يعطر وشاحك
وان ما لفاك الحلم سولف مع الطيف........يمكن يدلك واين ؟تلقا صباحك

الموضوع الأصلي: امجار ياوجهي من الذل والحيف....كيف اقنعك هاالدمع ؟كيف استباحك؟ | | الكاتب: سحايب | | المصدر: شبكة بني عبس